BaKiNsKiY XuLiQaN [Off] (07.05.2015 / 13:50)
Son Sözü . (Nüsrət Kəsəmənli)

Gərək bu günümü görəydin özün,
Həsrətin yaş gəlib yaşımın üstə.
Bir ac qağayıya dönüb son sözün,
Hərlənir tufanlı başımın üstə.
Bu söz dincliyimə kəsilib qənim,
Nə topa buluddur,
Nə də bir əlçim.
Ilk sözün,
Ilk sevgi dünyamdı mənim,
Sənin son sözünü mən necə ölçüm?
Kimi öz oduna alışan görsəm,
Atıram qəlbimi həsrət oduna,
Harda qaşqabaqlı bir oğlan görsəm,
Sanıram son sözü deyiblər ona...
Qəlbim öz səhvinə çoxmu yanacaq,
Niyə bəs qədrini bilmədim onda?!
Axır qiymətini tapdım mən ancaq,
Səni itirmişdim onu tapanda...
Hər ürək bir ocaq,
Hər ürək nəğmə,
Nəğməm alışıbdır, tüstülənibdir.
Mənə elə gəlir hər kövrək nəğmə
Sənin son sözünə bəstələnibdir.
Getdin...
Bu gedişdən nə düşdü mənə?
Neçə lal hıçqırıq gözlərimdədir.
Ilk sözü dodağım demişdi mənə,
Son sözü yaşaran gözlərin dedi.
Indi məhəbbətim həsrət dənizi,
Orda dalğaların yarışı başlar.
Tutular göylərin mavi bənizi
Sonra da son sözün yağışı başlar...
Qəlbim öz səhvinə çoxmu yanacaq,
Niyə bəs qədrini bilmədim onda?
Axır qiymətini tapdım mən,
ancaq,
Səni itirmişdim onu tapanda...