Silent_World [Off] (18.01.2011 / 22:21)
Ədalət şam kimi əriyir, ALLAH
Zor haqqı divara dirəyir, ALLAH
Yalan ayaq açıb yeriyir, ALLAH
Bacara bilmirsə doğru yalanla
De, necə barışım mən bu zamanla?

Mərdlərin başını namərdlər yeyir
Şərə göz vermiyib, göz yumur xeyir
Gədalar özünə şahən şah deyir
Yaxşılar iş görür pislə, yamanla
De, necə barışım mən bu zamanla?

Ürəklər soyuyub olub buz kimi
Namus çeynənilir bir saqqız kimi
On ilin pozğunu təmiz qız kimi
Gəlin köçürən var toyla, nişanla
De, necə barışım mən bu zamanla?

Bığsız kişiləri, el ağsaqqalı
Elmdən dən vurur ağıldan kalı
Pələngə tay olub çaqqal, çuqqalı
Qoyunu aşnalıq edir qabanla
De, necə barışım mən bu zamanla?

Qeyrət çoxları üçün olub qeyri-ət
Bir milyon qaçqını olan bu millət
Dözüb, səbr eyləyir dəhşətdi-dəhşət
Yuya bilmiriksə biz qanı-qanla
De, necə barışım mən bu zamanla?

Ramil Səfərova azaddıq, hanı?
Verdik yad əllərə o mərd oğlanı
ALLAH yerə soxsun azərbaycanı
Bu həyalı canla, bu həyacanla
De, necə barışım mən bu zamanla?

İndi bir şüar var, yaşasın rüşvət
Başda vəzifədir, ayaqda qeyrət
Bu yolla haraya gedir bu millət
Yolu kəsmək olmur hətta Quranla
De, necə barışım mən bu zamanla?

Ata, anasını oğraşlar bu gün
Qocalar evinə edirsə sürgün
Qarabağ alınar? Bu qeyri-mümkün
Dünyanı titrədən ahu fəğanla
De, necə barışım mən bu zamanla?

Hər kəs öz xeyrin güdür həyatda
Bu işə ALLAH da mat qalıb hətta
İki doğma qardaş bu damın altda
Bir ocaq yandırır iki qazanla
De, necə barışım mən bu zamanla?

Haqqa yox, indi nəfsədir etiqad
Bir kimsə yoxsula etməyir imdad
Varlı öz dövlətin çəkdirir ey Dad
Kasıb öz çəkisini çəkən qapanla
De, necə barışım mən bu zamanla?

Varlı süfrəsində olan tox milçək
Görür ac kasıbdan hörmətdə yüksək
Pul üçün fağıra hansısa eşşək
Əgər əmr edirsə xoruz tək banla
De, necə barışım mən bu zamanla?

Kasıb nə deyirsə, əşi deyirlər
Dəlidi, işləmir başı deyirlər
İndi dövlətdiyə kişi deyirlər
Mənlik ölçülürsə dövlətlə-şanla
De, necə barışım mən bu zamanla?

Yayın istisində, qışın qarında
Kişi var yaşatmaq intizarında
Neft-qaz ölkəsində qul bazarında
Eşşək tək işləyir çulla, palanla
De, necə barışım mən bu zamanla?

Avropa dəbinə olandan kölə
Ar zibil şəklində atılıb çölə
Adam xəcalətdən az qalır ölə
Dar balaq şalvarla, yarıq tumanla
De, necə barışım mən bu zamanla?

Mən vəhşi çimərlik gördüm bu yayda
Diqqət! Fahişəxana tikilir ayda
Ata Moskvada, ana Dubayda
Oğul parapetdə, qız özcanla
De, necə barışım mən bu zamanla?

Şairlər yazmasın sevgi şerini
Məcnunlar bulvarda gəzir Leylini
Erkəklər erkəyə salır meylini
Nigah bağlıyırsa Zənan-Sənanla
De, necə barışım mən bu zamanla?

Kişi var ev satıb qız kirələyir
Firrenni moteldə can şirələyir
Arvad uşağısa baş girələyir
Bir parça çörəklə, bir baş soğanla
De, necə barışım mən bu zamanla?

Arvad var ərinin sözünə baxmır
Ər var arvadının üzünə baxmır
Bu dünya güzgüdə özünə baxmır
Hanı Nuh Peyğəmbər gəlsin tufanla
De, necə barışım mən bu zamanla?

Məmurlar Firon tək əyləşib taxtda
Torpaq qanununun icrası saxta
Kompüter texnika olan bu vaxtda
Kəndli yer şumlayır xışla, tokanla
De, necə barışım mən bu zamanla?

Cinayət törədən hakim bizdədir
Xəstəsin öldürən həkim bizdədir
Özünü kəşf etməyən alim bizdədir
Bu əsəbi başla, bu dərdli canla
De, necə barışım mən bu zamanla?

Gerayin saqqızdı yoxsa marojni
Görən hara baxır bizim tamojni
Xalqın cavanları ex kak palojni
Yeni əsrə gedir əldə bayanla
De, necə barışım mən bu zamanla?

Cengi bata-bata batır zatımız
Yallı yox caz gedir camaatımız
Məhv olmaq üzrədir muğamatımız
Əgər küsmüşüksə tarla, kamanla
De, necə barışım mən bu zamanla?

Güldürüb özünə şarlatanları
Birləşmir dünyanın Müsəlmanları
Mənə fitva versin din ürfanları
İki təriqətlə, iki azanla
De, necə barışım mən bu zamanla?

Azmıdır bu xalqın din işğalçısı
Dələduz mollası, gopçu falçısı
Hacı pivəsinin istehsalçısı
Saziş bağlayırsa dini dükanla
De, necə barışım mən bu zamanla?

Dinlədikcə şeytan çalan havanı
Eyləyirik haqqa qarşı dabanı
Çoxu məhşərdəki haqqı divanı
Səhv salır embavuddakı divanla
De, necə barışım mən bu zamanla?

Mən Nəsimi övladıyam ar arsız
Sizə qalsa lap dərimi soyarsız
Kəfənimə qələm, vərəq qoyarsız
Haqq Dünyasın gözləyirəm gümanla
De, necə barışım mən bu zamanla?

Xəyala dalıram bir an içində
Günahsız əllərim al-qan içində
Bu şeri yazmışam zindan içində
Mən şair Ramizəm, az məni danla
Barışan deyiləm mən bu zamanla!