KoNCeNo [Off] (09.03.2016 / 15:43)
Günlərdir sosial şəbəkələrdə 8 Martda qadınlara hədiyyə alınmalıdır, ya yox deyə müzakirə aparılır. Yarızarafat, yarıciddi kişilərin bu gündən necə qurtulacağı sual edilir. Bu günlər ərzində qadına kitab almaq da, gül almaq da, ətir almaq da məsxərəyə qoyuldu. Sonra dedilər ki, axı niyə ancaq biz qadınlara hədiyyə almalıyıq, bizim niyə hədiyyə alacağımız gün yoxdur? Əl-qərəz, hədiyyə, hədiyyə, hədiyyə...

Açığı, bu, mənə heç də xoş olmadı. Fikirləşdim ki, niyə Azərbaycan kişisi öz qadınını, anasını, bacısını təbrik etmək, onlara hədiyyə almaq üçün bu qədər götür-qoy edir, cavab tapmaq üçün ağsaqqal məclisi qurur? Niyə bu sual onu belə narahat edir? Niyə qadının günü deyiləndə ancaq maddi mənada, xərc-xəsarət başa düşülür? Elə olsa belə, hədiyyə dediyiniz isə 5 manatlıq gül, 3 manatlıq kitab, 2 manatlıq corab, 1 manatlıq fincan, 50 qəpiklik saç broşudur.

Ancaq bütün suallarımın cavabında və sadaladığım hədiyyələrin sonunda ağlıma bunlarla kifayətlənməyən qadınlar gəldi. Ona 50 qəpiklik, 1 manatlıq hədiyyə veriləndə, yaxud bir doğması, həyat yoldaşı onu sözlə təbrik edəndə göstərdiyi üz...

Bir də bu yaxınlarda gözəllik salonunda şahidi olduğum söhbəti xatırladım. Qadının biri ərinə dediyi yalandan danışırdı. Yalan da nə yalan... Qızının bağça pulunu, əslində, özü ödəyib, ancaq günlərdir ərinin başının ətini yeyirmiş ki, bəs pulu ödəmək lazımdır. İndi də danışır ki, ərim pulu tapıb gətirdi. İş yoldaşı da soruşur ki, hardan tapdı, soruşmadın? Deyir, yox, soruşsam, dərininə getsəm, verməyəcək. Allah bilir, hardan tapıb, mənə deyəndi? Nə işimə qalıb, pulu götürüb qoydum cibimə.

İndi təsəvvür edin, bu qadına 8 Martda hədiyyə alınmasa, evdə nə həngamə qopar? Axı sabah işdə gəlib nə deyər? Ər yazıq da yenə Allah bilir, hardan 5-10 manat tapıb hədiyyə alacaq da, gətirəcək də. Və bu kişi bütün Azərbaycan qadınlarına eyni gözlə baxmağa başlayacaq, bütün qadınları öz arvadı kimi biləcək. Yəni bir qadının yalançı, acgöz olması bəsdir ki, digərləri haqqında elə düşünsün. Mən çıxıb o kişini necə başa salım ki, əslində, bütün qadınlar elə deyil. Qadını sevmək, hörmət etmək yetərlidir. Onun gözü toxdur, və sair, və ilaxır. Boşdur.

Belə bir lətifə var. Bir xəstəxanada çox gözəl tibb bacıları olur. Elə bil bu tibb bacılarını xüsusi olaraq dünya gözəlləri arasından seçib gətiriblər. Pasiyentlərdən biri hər dəfə onları görəndə eyni sözləri deyir: "Bozluq!"

Onunla eyni palatada yatan adam bir gün dözməyib soruşur: "Sən niyə bu cür gözəl qızlara "bozluq" deyirsən?"

Adam cavab verir: "O qızlara demirəm. Hər dəfə onları görəndə öz arvadım yadıma düşür".

Bəli. Bu, ona görədir ki, bu ər-arvad arasında sevgi yoxdur, onlar bir-birlərinə gözəl görünmürlər. Onların həyatının gözəlləşməsi üçün nəsə başqa şey lazımdır, başqa şey. Çünki onlar ya sadəcə evlənmək xatirinə evləniblər, ya da romantikaya qapılıblar, gözlərinə heç nə görünməyib. İndi də ayılıblar və evləndikləri adam, yaşadıqları həyat onları qane etmir. Bahalı hədiyyələr istəyirlər, yaxşı həyat arzusundadırlar. Bu olmayanda da deyirlər ki, evlilik sevgini öldürür. Və onda sən ərinə yalan da danışırsan, hardan qazandığını bilmədiyin pulu da bəh-bəhlə xərcləyirsən.

Ancaq sevginin evini heç nə yıxa bilməz. Sevgi maddiyyat olmadan da özünü onun yanında xoşbəxt hiss etməkdir. Yanında olması sənə yetir. Sevincək olursan, özünü hamıdan yüksəkdə, ən bahalı geyimi geyinmiş kimi, bütün qadınlardan gözəl hiss edirsən. Sevdiyini, onun imkanlarını başa düşürsən, incimirsən, qırılmırsan. Bu sevgi həm də sənə azadlıq verir, özün ola bilirsən. Kiminsə yanında qürrələnmək üçün heç nə arzulamırsan. Az yeyəndə də, çox yeyəndə də, yaxşı geyinəndə də, pis geyinəndə də sevgin azalmır. Həyatdan dərs aldıqca sevdiyin insanla birlikdə çətinliklərə dözürsən və sevgin sənə kömək olur. Bəli, hədiyyədən fərqli olaraq, sevgi, sevgi, sevgi...

Məncə, qadın kişiyə sevgi versə, bütün çətinlikdən sevgiylə çıxsa, ona bank kimi baxmasa, kişi də onu təbrik edib-etməyəcəyini, hədiyyə alıb-almayacağını müzakirəyə çıxarmaz. Yerimizi, kimliyimizi özümüz müəyyən edək, bozluğun içində itib-batmayaq. Bozluq olmamaq arzusu ilə bayramınız mübarək, əziz qadınlar! Gözünüz tox olsa, könlünüz də tox olar.