Ardarazli [Off] (06.07.2016 / 07:49)
NASA-nın "Yunona" kosmik qurğusu 5 illik uçuşdan sonra Yupiterin orbitinə çatıb, bir azdan ordan şəkillər də göndərəcək. Bu yadıma "Voyacer" kosmik aparatını saldı, çünki o da vaxtilə Yupiterin yanından keçəndə maraqlı şəkillər çəkmişdi. "Voyacer"lə bağlı bir həqiqəti isə təzə öyrənmişəm, sən demə 2007-ci ildə onun Günəş sistemini tərk etməsi düzgün elmi məlumat deyil. Qurğu hələ də Günəş sistemində uçur. Görün nə boyda ərazidir - "Voyacer" ildə 494 milyon kilometr, yaxud saniyədə 15 kilometr sürətlə Günəş sistemindən çıxmağa çalışır, amma hələ buralardadır :) 1977-ci ildən - start günündən bəri qurğu Günəşdən 16,6 milyard kilometr aralanıb. Tək Günəş sistemi bu boydadırsa, gör Süd Yolu Qalaktikası, Kainat özü nə zırıltıdır.

"Voyacer"i bizim üçün əziz edən bir səbəb də var: onun içində başqa planetlərdəki ehtimal edilən varlıqlara məktub-disk qoyulub, o diskdə mahnılar da var və onlardan biri də Azərbaycan musiqisidir. Zurnada çalınır. Yerdən müxtəlif təbiət səsləri ilə yanaşı cəmi 90 dəqiqə musiqi seçilib, içində klassik musiqi-filan da var. Bizim musiqi 2 dəqiqə 35 saniyədir. Hazırda bu musiqimiz bizdən 16,6 milyard kilometr aralıya çatmışdır.