Ardarazli [Off] (11.11.2016 / 13:19)
İcra başçısının sözlərinə bax: "Daşkəsənin özündə 120 nəfərə qədər erməni qadını var, qohumlarının hamısı Ermənistandadır. İndi də bizə deyirlər ki, “sizin arvadınızıq, sizin qulluqçunuzuq, sizə xidmət edirik”.
Bu sözlərin harasından baxsan, cəhalət yağır.
Əvvəla, millət mənsubiyyətindən asılı olmayaraq, Daşkəsəndə yaşayan həmin adamlar sənin vətəndaşındır. Sən də onlara ya vətəndaş kimi yanaşmalısan, ya da rayonundan, ölkəndən deportasiya etməlisən. Əhəd Abiyevin fikirlərindən isə belə çıxır ki, onun şəxsən 120 kənizi var və onlarla istədiyi kimi davrana bilər-ya arvadı, ya qulluqçusu, ya da xidmətçisi kimi.
İkincisi, hadisəyə bu cür yanaşma cinsi ayrıseçkilikdir. Həmin 120 erməni sırf qadın olduqları üçün yumruqla Ermənistan əvəzinə Kolumbiya bayrağını sındıracaq qədər nifrətdən gözü tutulan icra başçısının seks kölələrinə çevriliblər. Hər halda Abıyevin sözlərindən belə çıxır.
Üçüncüsü, icra başçısı yumruqla şiferdən bayraq sındırmaq qəhrəmanlığı, sonra isə qürrələnə-qürrələnə bundan danışması ilə ermənilərin dürməyinə yağ sürtür. Nədən ki, Qarabağı işğal edən ermənilər öz əməllərinə azərbaycanlıların onlara insan kimi baxmadıqlarını bildirərək, haqq qazandırır, cəmiyyətimizi vəhşi kimi göstərir və bütün bunlara görə bir daha ölkəmizin tərkibində yaşaya bilməyəcəklərini "əsaslandırırlar". Erməniyə nifrətdən sındırdığı bayrağın kimə məxsus olmasını belə, görə bilməyəcək qədər kor olan və sırf məlum millətin fərdi olaraq yaradıldığı üçün 120 kimsəsizə cariyə, kölə kimi baxan rəhbər obrazı həmin arqumentin ən bariz "sübutu" deyilmi? Bütün bu düşünülməmiş hərəkətlərə imza atan birisi hələ utanmadan da onun cəhalətini pisləyənləri ermənilikdə və ya düşmənə işləməkdə suçlayır.
Qüsura baxma, cənab Abıyev, sənin bu cəhalətin varkən, bizim düşmənə ehtiyacımız yoxdur.