Zeqqumagaci [Off] (10.01.2017 / 21:09)
Düzəliş Keçmişini Göstər
Aslan Ismayilov
Mehman Huseynov la bağlı baş verənlərin sonrası necə olacaq bilmirəm. Ancaq bu gün onunla bağlı baş verənləri, xüsusilə özünün məhkəmədən dərhal sonra müsahibəsini ürək ağrısı ilə izlədim. Mehmanın dediklərini 30 may 2013-cü ildə DİN Baş Mütəşəkkil Cinayətkarlıqla Mübarizə İdarəsində özüm yaşamışam (şərhdə) və onun dediklərinə inanıram. Baş verənlər artıq insan haqları demirəm, dövlətçilik prinsiplərinin itirilməsi, zorun hələlik qələbə çalmasıdır. Həyat təcrübəmə arxalanaraq bunu edənlərin, onların balalarının peşman olacaqlarına heç bir şübhəm yoxdur. Texnologiyasız, internetsiz 37-ci illərdə baş verənlər üstündən 50, 60, 70 il keçdikdən sonra hamıya bəlli oldu. Bir vaxtlar ataları, babaları haqqında qürurla danışanlar bu gün susurlar, bəziləri familiyalarını belə dəyişirlər ki, onların kimin törəmələri olduqlarını bilən olmasın. Bu gün haqsızlıq edənlər isə az sonra mütləq cavab verəcəklər. Necə? Yaxın vaxtlar bunu göstərəcək deyə bu barədə danışmaq istəmirəm. Bu gün məni narahat edən bəzi məsələləri qısaca diqqətinizə çatdırıram.
Əksəriyyət Mehmana dəstək olsa da bəziləri “özləri edirlər”, “bu da bir şoudur” və s. ifadələrlə bilərəkdən, bəziləri isə bilməyərəkdən bu hakimiyyətin uzun illərdir ki, müvəffəqiyyətlə həyata keçirdiyi əməliyyata dəstək oldular. Bəli, uzun illərdir ki, bu hakimiyyət haqqın tərəfində olanlara “satqın” damğası vurdurmaqla bu millətin mübarizliyini qırmağa çalışır. Ancaq əminəm ki, 1918-ci il təlatümlərində ADR qurmuş bir milləti sındırmaq olmaz!
Ola bilsin bu hakimiyyət bir müddət sonra həqiqətən Mehmanın hansısa sənədə imza atmasını ortaya qoysun. Bu Mehmana qarşı olan murdarlığa, qanunsuzluğa heç bir bəraət verə bilməz. Mehman hələ ki, həyat sınağından keçən gənc bir adamdır. Onun həbs müddəti hansı zorakılıqlara, təhqirlərə, mənəvi terrora məruz qaldığını ancaq o sınağı keçmişlər bilər. Tanıdıqlarımız, bu gün mübarizlikdən dəm vuran bəzi insanlar o “sınaq”dan sonra lal dinməz oldular, bəziləri isə hətta məruz qaldıqları işgəncələri dillərinə belə gətirmədilər. Mehman isə gördüyü işgəncələri, əminəm ki, ona edilən qəti xəbərdarlıqlara baxmayaraq, olduğu kimi bildirdi.
“Biz 500 manata görə buna məcburuq” deyənləri isə əsla bağışlamaq olmaz. Bu sistemi ayaqda saxlayan tək əmr verənlər yox, birinci növbədə həmin qanunsuzluqları həyata keçirən şərəfsizlərdir və onları hamıya bildirmək lazımdır. Bu şərəfsizlərin adlarını, şəkillərini hamı tanımalıdır. Bununla bağlı məşhur fransız filmi “Oyuncaq”da deyildiyi kimi tərbiyəsiz göstəriş verənin, yaxud həmin o qanunsuz göstərişi icra edənlərdən kimlərin daha çox şərəfsiz olduqlar bəlli olmasa da hər ikisinin şərəfsiz olduğu bəllidir.
Bir daha bu əməllərə əl atanlar bilməlidirlər ki, özləri cavab verməsə də hökmən balaları qanun qarşısında cavab verəcək. Qanun qarşısında olmasa belə Allah qarşısında şübhəsiz.
P.S. Əgər bu ölkədə Baş Prokuror varsa bu olaya hökmən münasibət bildirməlidir.