Zeqqumagaci [Off] (08.11.2017 / 21:07)
Mir Şahin Ağayev - Fahişə (18+)
Vaxtsız ölən ruhun üçün kimsə halva çalmadı.
İsmətinin pərdəsində kimlər hava çalmadı.
Dodağından öpmək haram, bir cüt murdar cəsəddir
Namusun bir açıq qapı nə bacası, nə bəndir.
Xəlbirin göydə fırlanır, ələnir boş ələyin.
Onun-bunun qucağında yırğalanır taleyin.
Bu dünyaya hər bir uşaq ağlayaraq gələcək,
Sənin körpən bətnində də elə bic-bic güləcək.
Üzəvari təbəssümlər aldadacaq başını,
Hər gecə biri verəcək suyunu və aşını.
Birdəfəlik şəhvətlərə asan yemdi bədənin,
Hər gecə bir çarpayıdı indi yurdun, vətənin.
Ehtiraslı dodaqlarda solub adın gedəcək.
Hərə qaşıq batıracaq, tamın-dadın gedəcək.
Səndən ötrü nə fərqi var cavandır, ya qocadır?!
İndi başın aşağıdır, ayaqların ucadır.
İtirəcək işığını parıl-parıl gözlərin.
Görən səni indi harda, hansı erkək gözləyir?!
İndi hansı qonaq üçün ucuz yataq dəstisən,
"Danış!" desə dinəcəksən, kəsəcəksən kəs! desə!
Qızınacaq gəlib-gedən öləziyən istinə,
O, altına göz yumacaq, elə sən də üstünə.
Qurtaranla bitəcəksən, başlayanla başlayıb,
Yenə nəsə çalacaqsan boğazını yaşlayıb.
Bax beləcə yavaş-yavaş ömrün-günün gedəcək.
«ah-of» dolu nəfəslərdə səsin-ünün gedəcək.
Öpüşünün qiyməti də yavaş-yavaş düşəcək,
Tərli-tüklü sinələrlə aşağı sürüşəcək.
Yorğun-arğın dönəcəksən hər növbəti görüşdən.
Yer qaçacaq ayağından, ayaqların sürüşkən.
Göyə baxma! Göylərin də qəribədi işləri,
Daha nə qoç, daha nə şir, sənin bürcün müştəri.
Kimsə səni çağıracaq: «bir bax, fahişə, bir bax!»
donub-çaşıb qalacaqsan: ilahi, işə bir bax!
bu mənəmmi? deyəcəksən, mən ki, belə deyildim.
Niyə mənim düz ayağım əyri yolda əyildi?!
Niyə Allah taleyimdən məni razı salmadı?
Qucağına aldı hamı, ürəyinə almadı?!
Niyə mənim gedəcəyim, gül dolusu görüş yox?
Dodağımda öz ərimə saxlamağa öpüş yox?!
Mənim bətnim çirkab dolu, içim-çölüm haramdı,
bətnimdəcə bic-bic gülən yazıq dölüm haramdı!
Ağlayarsan için-için nə qəzəbdən, nə kindən,
utanarsan qızlıq vaxtı çəkdirdiyin şəkildən.
Sonra yenə çağıracaq səni aylı gecələr,
şəhvət dolu qaranlıqlar, kişi dolu küçələr.
Və beləcə hər kişidə bir az dadın gedəcək.
Bu dünyadan sonda yazıq, tənha qadın gedəcək!