Mr RoManTiC [Off] (15.12.2017 / 21:12)
Imam Zeynülabidin (ə) dilindən
Imam Hüseyn (ə) xitab.

Meydanə, Ya Hüseyn, nola, sən getmə, mən gedim,
Hicran qəmiylə qol-qola, sən getmə, mən gedim.

Əkbər qəmində oldu bu könlüm dəlik-dəlik,
Indi inan ki yoxdu vücudumda xəstəlik,
Rəhm et, ata nidası ilə bir də üstəlik,
Görmə rəva gözüm dola, sən getmə, mən gedim.

Getsən ədu kəsik başını qaldırar göyə,
Məsum qızın sorar ki, atam gəlmədi niyə?
Оnda cavab nə söyləyərəm mən Səkinəyə,
Qurban sənə bu can ola, sən getmə, mən gedim.

Axır nə qədr ah eşidim xeyməgahdən,
Meydanda qoymasan ölüm, ölləm bu ahdən,
Allaha and verim səni, keçmə Ilahidən,
Qolları boynuma dola, sən getmə, mən gedim.

Vermə əsir bu bidinü küffarə oğlunu,
Namərd əlində qoyma günü qarə oğlunu.
Əbbası öpdüyün kimi biçarə oğlunu,
Öp təşnə-təşnə sal yola, sən getmə, mən gedim.

Mən tək cahanda hansı bəlakeş zireh geyib,
Vermə təsəlli qalmağımın vəchi var deyib,
Mən neylərəm, nə söyləyərəm qardaş istəyib,
Zeynəb baxanda sağ-sola, sən getmə, mən gedim.

Heyfa ki vermədin bu günün fürsətin mənə,
Arif duyub bu halimi əfğan edir yenə,
Aşiqlərin diz üstə düşüb yalvarır sənə,
Meydanə, Ya Hüseyn, nola sən getmə, mən gedim.

Arif Buzovnalı