Mr RoManTiC [Off] (16.12.2017 / 00:55)
Həkim də olsan...

Həkim də olsan, ey afət, şəfasızın birisən,
Həmişə eyş ilə həmdəm cəfasızın birisən,
Nə vəsf edim səni, sən ki vəfasızın birisən,
Kim olsa həmnəfəsin əl-aman çəkər səndən.

Xəyali-vəsl ilə hicran qəmin yetər çəkdim,
Ömür fəda eləyib nazını hədər çəkdim,
Nə varsa çəkməli eşq içrə beş betər çəkdim,
Zaman gələr ki fələk imtəhan çəkər səndən.

Tüfeylin olmuşam, amma bir özgə mənada,
Bəlavü möhnətimin yox qiyası dünyada,
Nə Qeys Leylidə gördü, nə Vamiq Əzrada,
O zülmü ki gecə-gündüz bu can çəkər səndən.

Güvəndim eşqinə sidq ilə mən başıdaşlı,
İnanmadım ki, sonunda qalar gözüm yaşlı,
O qədr qanıma batdın ki, ey kamanqaşlı,
Günəş tüluya çıxan vaxtı qan çəkər səndən.

Gözəllik ilə qürur güc verir sənə guya,
Sürükləyir səni ifnaya bu iki xülya,
Qürura uyma, onu tarümar edər dünya,
Gözəlliyinsə hesabın zaman çəkər səndən.

Nə yer ki dəvət edirsən məni, kəfən geyirəm,
Qonaqlığında sənin dərd içib kədər yeyirəm,
Nə fərq edər kimə var bənzərin desəm, deyirəm—
Həqiqi xeyri tapar kim ziyan çəkər səndən.

Arif Buzovnalı