Mr RoManTiC [Off] (16.12.2017 / 01:10)
Ya Xızır

Gərçi çox kəs etdi şahlıq iddiasın, ya Xızır!
Çəkmədi bir kimsə dünyanın səfasın, ya Xızır!

Kim ki inşa eylədi bir mülk dövran sürməyə
Həm özün məhv etdi dövran, həm binasın, ya Xızır!

Saxta cənnət şövqünə Şəddad olanlar bilmədi
Aləmin neyçün və kim qoymuş əsasın, ya Xızır!

Az-az insan tapdı sirrin dəhrdə ömr etməyin
Ibtidasından edib kəşf intəhasın, ya Xızır!

Üz tutub Allahına dad eyləyən məzlumların
Göylər ağlar dinləyib ahü nəvasın, ya Xızır!

Dinlə əfğanın bu xəlqin vəcd ilə gəl riqqətə
Gəl eşit fəryad edən hər binəvasın, ya Xızır!

Sən duaçı ol bizə, eylə Xudadan iltimas
Zülm edən nakəslərin versin bəlasın, ya Xızır!

Təşnədir hökm etməyə öz məhvinə bais bəşər,
Bu axan qanlar da boğmaz ehtirasın, ya Xızır!

Cəhlə məhbus oldu aqil kimsələr azad ikən,
Bigünah əllər verir zəncir sədasın, ya Xızır!

“La fəta illa Əli la seyfə illa Zülfüqar”
Xəlq əfsus dərk edir tək “La fəta”sın, ya Xızır!

Zülm edənlər ol nəsildəndir ki, bir vaxt Qasimin,
Eyləmişlər qanə qəltan toy libasın, ya Xızır!

Seyrə çıx Musa ilə əvvəlki tək eylə nizam
Sən bilirsən batini cürmün cəzasın, ya Xızır!

Qarə bayramın bu xəlqin ədl ilə ağ eylə gəl,
Ta bahar fəsli tapa nəşvü nümasın, ya Xızır!

Hər çətin asan olar gər keçsə nitqindən sənin
Hər nə dərd olsa Xuda eylər dəvasın, ya Xızır!

Diqqətindən xaric etmə olsa da nöqsanımız
Rubəru bəxş eylə Allahın şəfasın, ya Xızır!

Bir əlamət damğasın vur könlünün mehrabına
Ta ki Arif eşqinin qılsın qəzasın, ya Xızır!

Arif Buzovnalı