Ardarazli [Off] (15.01.2018 / 03:59)
İnsan yalnız həzz almaq deyil, həm də əzab duymaq istəyir... Bu hər insanın qədərinə yazılmış bir tələbdir. İnsan bəzən əzabdan qaçır, bəzən də əzaba doğru qaçır, onu yaşayaraq zövq almaq istəyir. İnsan daim əzab və həzz arasında hərəkət edir...

Psixoanalitiklər buna tanatos hissi deyir və libidonun (həzz almanın) əksi kimi qəbul edirlər. həzz alma pik nöqtəyə çatanda əzab alma hissinə çevrilir və insan bu dəfə əzabdan zövq alır. Libidosu yüksək olan və artıq hər bir həzzin orqazmına yetişən ölkələrdə adrenalin riskləri və ölüm fəndləri yaşayanların çox olması əzabdan zövq almanın bir nəticəsidir. Tamamlanmış libido əzabdan zövq almağa çevrilmişdir...

Libidonu yaşamaq istəmədən yalnız əzabdan zövq alanlar pessimistlərdir. onlar daim kədərlənməyi, yas içində qalmağı sevirlər. Belə insanları pessimizmdən ayırmaq istəyən əslində onları öz xoşbəxtliklərindən ayırmağa calışdıqlarını bilməlidir...

Elə bir insan yoxdur ki mazoxist təbiətli olmasın və bir an da olsa belə ya fiziki, ya da psixi ağrılar yaşayaraq əzab dadmaq istəməsin. Dünyada bütün dinlər və təriqətlər insanın bu tələbini gözəl anlamış və rituallarında xüsusi əzab verici hərəkətlərə yer vermişlər... qılınc vurmaq, yanar közlər üzərində ayaqyalın qaçmaq, hündür yerlərdən yumalanmaq, qanlar içində qalana qədər qırmanclanmaq və s. həmin rituallardan bəziləridir... Oruc da əzab hissi verən bir əməldir...

Erik Fromma görə uzun zaman əzab dadmayan (mazoxist olmayan) insanlarda əzab vermə hissi (sadizm) yaranmağa başlayacaqdır... Təbiət qadınlara daha çox əzab yaşatdığı üçün onlar daha az sadistdirlər... Menstruasiya olmaq, doğmaq və cinsi yaxınlıqda passiv tərəf qalmaq qadınları mazoxist etmiş və bu səbəblə onlar ən sülhpərvər və mülayim varlıqlar ola bilmişlər... Kişilər mazoxizmi az yaşadıqları üçün daha çox sadist olmuş və buna görə də bütün müharibələri kişilər törətmişlər... Erik Fromm bu halların heç birini yaşamayan qadınların sadist olacağını iddia etmişdir...

Yeməklərdə bibər yemək, münasibətlərdə eşq yaşamaq və tragediya janrına böyük sevgi duymaq mazoxist təbiətimizin bir nəticəsidir... çünki hər birində əzab vardır.

Elm insanın əzab yaşama istəyini hələ ki endorfin hormonu ilə izah etmişdir. Ağrı zamanı bu hormon aktivləşir və ağrını kəsməklə insana ağrılı həzz hissini yaşadır... (lakin bu mövzuda tam geniş elmi açıqlamalar yoxdur)