Zeqqumagaci [Off] (27.04.2018 / 19:46)
Yuval Noah Harari - "Sapiens" əsərində yazır:
"Elitar mədəniyyət və yüksək sənət nöqteyi-nəzərindən baxsaq da, sadə insanların dünyasına ensək də, müasir mədəniyyətlərin əksəriyyətində imperiya mirasının izlərini görürük. Bu gün çoxumuz əcdadlarımıza qılınc gücünə qəbul etdirilən imperiya dillərində danışır, düşünür və yuxu görürük. Şərqi asiyalıların böyük bir hissəsi Han imperiyasının dilində danışır və xəyal qurur. Köklərindən asılı olmayaraq, Alyaskanın Barrou yarımadasından Magellan boğazına qədər iki Amerika qitəsində bu gün yaşayan bütün insanlar bu dörd imperiya dilindən biri ilə ünsiyyət qurur: ispanca, portuqalca, fransızca və ingiliscə. Müasir misirlilər ərəbcə danışır, özlərini ərəb hesab edir və 7-ci əsrdə Misiri işğal edib, baş verən üsyanları dəmir yumruqla əzən Ərəb İmperiyasına ürəkdən bağlıdırlar. Cənubi Amerika 10 milyona yaxın zulu 19-cu əsrdə Zulunun qızıl dövrünü qürurla xatırlayırlar, halbuki bunların çoxu Zulu İmperiyasına qarşı döyüşən və yalnız qanlı hərbi əməliyyatlar nəticəsində imperiyaya tabe etdirilən qəbilələrdən törəyib."
İndi bir də özümüzü düşünək, neçə-neçə imperiyalar keçib üstümüzdən. Və hər biri öz təsirini bu gün də göstərir. Adicə dini nöqteyi-nəzərdən yanaşsaq vaxtilə bir qismi alova, digər qismi xristianlığa mənsub bir kütlə sonradan islamı qəbul etdi, lakin alova olan inamı yenə itirmədik. Alovun üzərindən tullanır, öz xəstəliklərimizi odlara tökürük. İslamdan sonra növbəti mərhələ - ateizm mərhələsi gəldi. SSRİ dövründə bütün köhnə dinlər və etiqadlar unutduruldu. DİN XALQLAR ÜÇÜN TİRYƏKDİR şüarı ilə məktəblərdə ateizm təbliğ olundu amma xalqımız yenə də mənsub olduqları dini unutmadılar. Sadəcə biraz dəyişik şəkildə saxladılar keçmişi. Bu gün toylarda əlində şərab badəsi ilə ALLAH XOŞBƏXT ETSİN deyən dayılar, əmilər bəhs etdiyimiz bu sintezin ən bariz nümunələridir. Nəticə olaraq başıbəlalı olmuşuq. O qədər qısa vaxtda o qədər çox mədəniyyət qəbul edib rədd etmişik ki artıq kütlənin böyük bir hissəsi nə mədəniyyətinin, nə dini mənsubiyyətinin, nə də milli mənsubiyyətinin nə olduğunu bilmir. Multikulturalizm bu olsa gərək...