Senin_orxan [Off] (31.10.2010 / 14:50)
Hədislərin birində buyrulur:
“Allah əmr edib ki, insan ona şükür etsin, həm də valideynə ehtiram göstərsin. Hər kim valideynə ehtiram bəsləməsə, heç Allaha da şükür etməmişdir”.
Valideynlərimiz min bir çətinliyə dözərək bizi böyüdüb tərbiyə edir, hər bir ehtiyacımızı yerinə yetirirlər. Analarımızın bizim üçün qatlaşdığı əzab-əzıyyətləri barədə çox danışılıb,çox deyilib. Ana mövzusu burada yetərincədir. Bəs “ata” mövzusuna nə üçün müraciət etmirik görəsən?! Doğrudur, ana zəhməti ata zəhmətindən daha ağır və əvəzolunmazdır. Anamız bizi uzun müddət bətnində gəzdirir, gecələr yuxusuna haram qataraq keşiyimizi çəkir, bizi istidən, soyuqdan, xəstəliklərdən qoruyur. Bəlkə, elə məhz buna görədir ki, Peyğəmbərimizdən s. 3 dəfə təkrar olunaraq soruşulan: “Ey Allahın elçisi! Ən çox kimə qayğı göstərilməlidir?” suala, Peyğəmbər s. hər üçündə də “Anana!”-deyə cavab verir. 4-cü dəfə bu sual təkrarlandıqda, Rəsulallah: “Atana! Sonra da ən yaxın, ən yaxın olanlara” – deyə cavab verir. Hədisdən də göründüyü kimi, Peyğəmbərimiz s. hamıdan öncə ANAya, daha sonra ATAya və digər doğmalarımıza ehtiram bəsləməyimizi və sevməyimizi buyurur. Bizim uğrumuzda atamızın qatlaşdığı əzab-əziyyətlər də anamızın çəkdiklərindən az deyil. Atamız heç bir təmənna ummadan, soyuq-isti, çətin-asan, gecə-gündüz bilmədən bütün rahatlığını bizə fəda edir, yemək, geyim və s. təmin etmək üçün özünü oda-közə vurur. Axı bunları necə unutmaq olar? Bu zəhməti qiymətləndirməmək ən azından insafsızlıq olar. Bizim də borcumuz onu sevərəkdən hörmətini saxlamaq, yaşlandıqda şəfqətimizi əsirgəməmək, hər zaman, hər yerdə əməllərimizlə, uğurlarımızla onun başını uca etməkdir. Peyğəmbərimiz s. “Övladın valideynə məhəbbət və şəfqətlə baxması ibadətdir” , “Ataya itaət – Allaha itaətdir, atanın üzünə ağ olmaq - Allahın üzünə ağ olmaqdır”– deyə buyurmuşdur.


Hörmətli userlər! İstərdim ki, açdığım bu mövzuyla bağlı fikirlərinizi bölüşəsiniz. Sizcə nə üçün əsərlərdə, şeirlərdə “ata” mövzusuna çox az müraciət olunur? “ATA” məfhumu sizə nə deyir? Bir də istərdim ki, atanızı necə, nə qədər sevdiyinizi elə bu anda qəlbinizdən gələn sözlərlə ifadə edərək bu mövzuda etiraf edəsiniz...