Meshhur qanuni ogru Vyacheslav Ivankov.

Məşhur “qanuni oğru”, “Yaponçik” ləqəbli Vyaçeslav Kiriloviç İvankov haqda indiyəcən yüzlərlə məqalə yazılıb. Özü də təkcə Rusiyada yox: ABŞ-da, İngiltərədə, Fransada, Kanada da, hətta Azərbaycanın özündə belə. Qərbdə onu keçmiş SSRİ məkanının ən nüfuzlu kriminal avtoriteti hesab edirlər. Rusiyanın cinayətkar aləmi üçün o az qala Allahdır. Bütün dünyada onun isə haqqında ən ağlasığmaz rəvayətlər gəzir, əfsanələr dolaşır.
Dünən etibarlı bir mənbədən xəbər alanda ki, “Yaponçik” Ermənistana səfərini başa vurub Azərbaycana da gəlmək istəyir, əslində bunu o qədər də ciddiyə almaq istəmirdik. Amma Rusiyanın internet saytlarına nəzər saldıqda məlum oldu ki, “cinayətkar aləmin bu nəhəng insanı”nı - ifadə məşhur rus estrada müğənnisi Villi Tokarevindir - Azərbaycan və azərbaycanlı kriminal avtoritetlərlə də bağlayan tellər də varmış. Biz İvankovun Bakıya nə üçün gəlmək istədiyi barədə ətraflı yazacağıq. Amma hələ ki onun həyatı ilə bir qədər yaxından tanış olsaq, sizlər üçün də maraqlı olar.
Məktəbli Vyaçeslav “Monqol”un bandasına necə düşdü?

Vyaçeslav Kiriloviç İvankov 1940-cı ildə Odessa yaxınlığındakı kiçik xutorda anadan olub. 20-ci əsr Rusiya kriminal tarixini araşdıran jurnalistlərin tədqiqatından belə məlum olur ki, indiyəcən bu ölkədə “Yaponçik” ləqəbli iki avtoritet olub. Onlardan biri hələ ötən əsrin 20-ci illərində məşhur seyf oğrusu kimi tanınırmış. Maraqlısı odur ki, həmin “Yaponçik”də məhz odessalı imiş. Amma bizim qəhrəmanımızın keçmiş adaşına heç bir dəxli yoxdur. Bu ləqəb ona gözünün bir qədər qıyıq olduğuna görə, kriminal aləmdə özünə “xaç atası” hesab etdiyi “Monqol” ləqəbli Gennadi Korkov tərəfindən verilib. Şahidlərin dediyinə görə, İvankov hələ məktəbdə oxuyarkən o zamanların ən məşhur banda başçılarından olan “Monqol”a qoşulur. 16 yaşında boks üzrə SSRİ idman ustası normativini ödəmiş İvankov “Monqol”un yanına “Bitumşik” ləqəbli başqa bir avtoritetin məsləhəti ilə gedir. Bu həmin “Bitumşik”dir ki, ona bu ləqəbi caynağına keçirdiyi qurbanının sir-sifətini qaynar qırla yandırdığına görə vermişdilər. İvankov əvvəlcə onun yanında “dərs” alır. Amma sonradan KİV-ə verdiyi müsahibələrinin birində etiraf edəcəkdi ki, bu cür vəhşi üsulla adama əzab vermək onda ikrah doğurduğundan “Bitumşik”dən aralanıb, “Monqol”un dəstəsinə keçir. “Monqol”un yanında isə İvankov tez bir zamanda bandanın aparıcı üzvlərindən birinə çevrilir. Sonradan bir DTK agenti xatırlayacaqdı: “Bu adam canavar kimidir. Adam öldürmək, ev qarət etmək, kiməsə hədə-qorxu gəlmək, bir sözlə, bütün cinayətlərə gedirdi. 70-ci illərin kriminal elementlərinin əsas qurbanları mağaza sahibləri, gizli sex işlədənlər, kolleksiya toplayanlar və s. idi. Bu bandanın qurbanları qorxularından heç vaxt milisə şikayət etmədikləri üçün cinayətkarların da izinə düşmək mümkün olmurdu”.

60-cı illərin ortalarından etibarən banda öz fəaliyyətini paytaxt Moskvaya “transfer edir”. Çoxsaylı oğurluqlar, vəzifə sahiblərindən təhdid yolu ilə pul qoparılması, qətllər tezliklə Moskva milisini də ciddi fəaliyyətə keçməyə məcbur edir. Bandanın içərisinə yeridilən agentlərin köməyi ilə tezliklə “Monqol” və dostları ələ keçir. Yaxalanalar arasında artıq “Yaponçik” ləqəbi almış İvankov da var idi. 1972-ci ildə banda üzvlərinin məhkəməsi olur. İstintaq və məhkəmə heç nəyi sübut edə bilmir. Amma “Monqol” 14 il azadlıqdan məhrum edilsə də, İvankov məhkəmə zalından azad edilir.Amma hökmdən bir neçə gün keçəcək, içəridən gələn “ksiva”dan məlum olacaq ki, “Monqol” “Yaponçik”in varisi elan edib.

“Yaponçik” öz bandasını yaradır.

Tezliklə onun tərəfindən elə bir cinayətkar dəstə formalaşdırılır ki, nəinki Moskvanı, bütün Sovet İttifaqını ayaqüstə saxlayır. Onların qurbanları yenə də gizli milyonçular olur. Bandaya öz xoşuna bac verməyənlər amansız işgəncələrə məruz qalır. Tezliklə “Asəf” və “Sliva” adlı məşhur avtoritetlər də ona qoşulur. İttifaqın əksər iri şəhərlərinin - Sverdlovsk, Riqa, Daşkənd, Bakı, İrəvan, Tiflisin gizli milyonçuları banda üzvlərinə bac vermək məcburiyyətində qalırlar. 1978-ci ildə Moskvanın “Rus” restoranında qafqazlılarla atışma zamanı milis “Yaponçik” başda olmaqla bir neçə banda üzvünü həbs edir. Elə həmin il məşhur “Butırka” həbsxanasında “Yaponçik”ə “qanuni oğru” titulu verilir.

80-ci illərdən başlayaraq o, artıq “KQB”nin birbaşa nəzarətində olur. Kəşfiyyatçılar gözəl başa düşürdülər ki, “Yaponçik” demək olar ki, bütün milis ierarxiyasını ələ alıb. 81-ci ildə SSRİ-nin bütün “qanuni oğruları”nın “Yalta sammiti” “KQB” dağıdır. İvankovu həbs edib Maqadana sürgün edirlər. Burda isə o, daha bir cinayət törədir. Türmədə cəza çəkən başqa bir “qanuni oğru”, “Maxo” ləqəbli İlya Simoniyaya anasından göndərilmiş məktubu cırdığı üçün milis leytenantı Kuşarenkonun həyatına sui-qəsd təşkil edir. Kuşarenko sağ qalsa da, ömürlük şikəst qalır.

Köməyə Kobzon gəlir.

Onun həbs müddətinin uzadılması üçün başlayacaq məhkəmə prosesi ərəfəsində onun köməyinə məşhur İosif Kobzon gəlir. SSRİ Ali Sovetinin deputatları Neçayev və Fyodorov SSRİ Ali Məhkəməsinə İvankovun vaxtından əvvəl azad edilməsi üçün sorğu göndərirlər. Sorğuya müsbət cavab verilir. Həmin vaxt hamı bilirdi ki, adı çəkilənlər İvankovu elə-belə müdafiə etmirlər. Sən demə, həm müğənni, həm də deputatlar “Yaponçik”ə qumarda uduzublar və ona külli-miqdarda pul borclu imişlər...

90-cı illərin əvvəllərində “Yaponçik” ABŞ-a köçür. Tezliklə o, Federal Təhqiqatlar Bürosunun diqqətini cəlb edir. Maraqlıdır ki, İvankovun ABŞ-a getməsinə şəraiti də Rusiyanın Daxili İşlər Nazirliyində və XİN-də isə yüksək rütbəli məmurlar yaradır. Onun üçün hətta diplomatik pasport belə hazırlanır. İrina Oley aldlı qadına 10 min dollar da verilir ki, İvankovla saxta kəbin kəsdirsin. Beləcə o, çox rahatlıqla okeanın o tayına keçə bilir. Orda isə məşhur rus rejissoru və aktyoru Rolan Bıkovla şərikli kinostudiya açır. Onun əsas biznesi isə Rusiyadan, keçmiş MDB ölkələrindən, hətta bir sıra Avropa ölkələrindən olan biznesmenlərdən aldığı xərac idi.


“Fidan” restoranında qətl

ABŞ-a getməmişdən əvvəl İvankov Rusiya ərazisində iki səs-küylü cinayət törədir. Onlardan biri Moskvanın mərkəzindəki azərbaycanlılara məxsus “Fidan” restoranında iki Türkiyə vətəndaşını öldürməsi idi. O vaxt bəziləri İvankovun Moskvada inşaat biznesi ilə məşğul olan türkləri bac vermədiyi üçün qətlə yetirdiyi qənaətində idilər. Amma sonradan keçiriləcək məhkəmə prosesində İvankov etiraf edəcəkdi ki, səbəb türklərin sadəcə özlərini yaxşı apara bilməməsi olub. “Adam göndərib onlardan özlərini yaxşı aparmağı xahiş etdim. Veclərinə almadılar. Üstəlik, məni ağır sözlərlə təhqir etdilər. Yerimdən qalxıb onları güllələdim”.

İvankov “Əl-Qaidə”yə silah da satıb


Hər halda bunu İngiltərənin Mİ-16 kəşfiyyatının şefi Riçard Dierlav etiraf edib. Onun dediyinə görə, Moskvanın məşhur “Solntsev” cinayətkar briqadası İvankovun göstərişi ilə Uraldakı kimya zavodlarının birindən kimyəvi silah hazırlanması üçün lazım olan maddələri Üsəma bin Ladenə ötürə bilib. Polşanın “VPROSI” jurnalında yazılanlara diqqət edək: “”Əl-Qaidə" keçmiş SSRİ ərazisindəki cinayətkar qruplaşmalarla əlaqəyə girərək onların vasitəsi ilə kimyəvi silahlar əldə edib. İsrail kəşfiyyatı da bu barədə məlumat yayıb. Kəşfiyyatın məlumatına görə, bütün bunlara İvankov ləqəbli rus avtoritet başçılıq edir. İndi o, ABŞ-dadır. Rusiyadakı nümayəndəsi isə ondan heç də geri qalmayan Semyon Moqileviç adlı birisidir". Bütün bunlar isə ABŞ-ın diqqətini cəlb etməyə bilməzdi. Çox keçmir ki, “Yaponçik” “Çara-bank”da çirkli pulların yuyulması ilə bağlı həbs edilir. Əslində bu, bəhanə idi. Sonradan məlum olacaqdı ki, həbsin əsl səbəbi bin Ladenlə əlaqələr imiş.