Kriminal dairələrdə “Rövşən Lənkəranski” ləqəbi ilə tanınan “qanuni oğru” Rövşən Caniyev Ukraynada həbs olunub.

. Kiyevin Qoloseyevsk rayon məhkəməsi Azərbaycan vətəndaşı olan R.Caniyev barəsində 40 sutkalıq həbs qərarı çıxarıb.

Ukrayna Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsindən (MCMBİ) bildiriblər ki, Azərbaycan DİN-i bu müddət ərzində “Rövşən Lənkəranski”nin ekstradisiyası ilə bağlı onlara müraciət etməlidir.

R.Caniyev dekabrın 3-də Kiyevdə tutulub. Onunla bərabər Kiyevdə yaşayan və mərkəzdəki restoranlardan birinin sahibi olan Rusiya vətəndaşı, eləcə də biznesmenin üç mühafizəçisi həbs olunub. Tutulanlardan rezin güllə atmaq üçün nəzərdə tutulan 2 ədəd “Fort-12P” və “PMR-9” tapançası və “Vulkan” karabini götürülüb.

“Rövşən Lənkəranski” Qafqazın ən nüfuzlu “qanuni oğru”larından biri sayılır. O, 2008-ci ilin yanvarında da MCMBİ əməkdaşları tərəfindən tutulub. Kiyevin Şevçenko rayon məhkəməsi o zaman da Caniyevin barəsində 40 günlük həbs qərarı çıxarıb. Amma həbsdə olan R.Caniyev əlaqələrindən istifadə edərək “qaçqın” statusu alıb və həbsdən çıxıb. Onun son günlərədək Ukrayna ərazisində qeyri-leqal şəkildə yaşadığı bildirilir. Ukrayna Ali Arbitraj məhkəməsi ona verilən qaçqın statusunu ləğv edib.

Qeyd edək ki, “Rövşən Lənkəranski” Azərbaycanda bir sıra ağır cinayətlər, o cümlədən sui-qəsdə cəhd və qanunsuz silah saxlamaq ittihamları ilə axtarışdadır.