Bir müddət əvvəl avtobusda şahid olduğum rəzaləti yazmaq istədim.
Elə bir rəzalət ki, gəl görəsən.
Deməli işdən çıxıb evə gedirəm, iritutumlu avtobusların birinə minmişəm, lap arxa cərgədə boş bir yer tapıb qəzetimizi vərəqləməyə başladım. Adətən 5-6 radələrində avtobusda bashabas olduğundan boş yer tapmaq çətin olur, amma niyəsə arxa cərgələrin bir-iki yeri boş idi.Nə isə, sözüm onda deyil, yerimi rahatladım...Elə bu vaxt orta sıraların yanında, pəncərə önündəki bashabasdan bir qışqırıq səsi gəldi. Boylandım, gənc bir qız üzünü yanındakı 30-35 yaşlı kişiyə tutub qışqırırdı.
Hamının diqqəti ora yönəldi.Qız: "Abırsız, utanmaz, ay oğ…, ay əc… neynirsən?” deyə hay-küy saldı və çantası ilə oğlana vurmağa başladı.Onun qışqırdığı oğlan isə öz kefində, qulağında qulaqcıqlarla musiqiyə qulaq asır, pəncərədən bayıra baxırdı, qızın ona hücumundan sonra özünü elə göstərdi ki, guya heç nədən xəbəri yoxdur.
Qızın qışqırığına bütün kişi sərnişinlər diqqətini yönəltdi, hamı oğlanın qıza əl-qol atmasını anladı. Sərnişin kişilər sürücüdən avtobusu saxlamağı tələb etdilər, avtobusun qapıları açılan kimi oğlanın yaxasından tutub yerə saldılar, bir neçə kisi eyni anda oğlanı döyməyə başladı.Avtobusun önündə bir vurçatlasın var ki, gəl görəsən. Oğlanı başqa sərnişinlər güc-bəla ilə döyənlərin əlindən aldı, o da arxasına belə baxmadan qaçdı.Sərnişinlər avtobusa mindi təkrar, oğlanın sataşdığı qız isə hirsindən qıpqırmızı olmuşdu, hələ də dodağının altında söylənirdi.Elə bu vaxt yaşlı sərnişin kişilərdən biri ucadan qıza dedi: "Bala, o geyimlə hələ çox qarşılaşacaqsan belə şeylərlə”…Lap arxa sırada oturduğum üçün qızın qurşaqdan aşağısını görmürdüm, bədəninin yuxarı hissəsinə qısaqollu, kifayət qədər açıqsinəli köynək geymişdi. Qız kişiyə tərs-tərs baxıb, avtobusu saxladıb düşdü.Pəncərənin önündən keçəndə geyimini tam görə bildim. Aşağı hissəsinə həddindən artıq dar və heç üst geyiminə bənzəməyən qısa bir şort geymişdi. O qədər qısa idi ki, ilk baxışda onun evdən alt paltarında çıxdığını zənn etmək olardı.

Kim bilir, bəlkə də tələsdiyindən evdən çıxanda üst paltarını geyinmək yadından çıxıb…