sherh yaddan cixmasin! Thanks.
AZERBAYCAN!
Hər gün üç dəfə əyilib, qalxıb, nəyə itaət etdiyini bilməmək qədər sıxıcıdır Azərbaycanda yaşamaq. Azərbaycanda yaşamaq ölkədə baş verən bütün haqsızlıqlar qarşısında susmaq qədər ağırdır. Azad sözü, vicdanları susduranda, oturub film kimi izləmək qədər əzablıdır Azərbaycanda yaşamaq.

Həm də ölmədən, daim, “sındırmaq üçün məni də apararlar” fikirləri içində boğulmaq deməkdir Azərbaycanda yaşamaq.

Azərbaycanda yaşamaq haqqını, qanunlarını, soyunu, kökünü unutmaqdır. Azərbaycanda yaşamaq Rəsulzadənin heykəlini sökəndə, yerində supermarket tikəndə, səsini içinə atıb içəridən yanmaq qədər dözülməzdir. Azərbaycanda yaşamaq “İlhamla irəli!” deyib, sonra çayxanada oturanda, “neyləyim, balalarımın çörəyi xətrinə boğazımı cırırdım” deməkdir.

Azərbaycanda yaşamaq rüşvət alıb, sonra ondan dilənçiyə pay vermək qədər bir işdir.

Fizika müəllimim həmişə uşaqlarin 90 faizindən rüşvət alır. O gün isə dilənçiyə on qəpik verdiyini gördüm. Cibindən iki dəmir pul çıxartdı. İyirmi qəpiyi cibinə qoydu, on qəpiyi dilənçiyə verdi. Mən də bir kənardan prosesi izləyirdim. Bir az duruxdum, bir az da doluxsundum. Bu qədər çirkaba bulaşmaqdır Azərbaycanda yaşamaq.

Hər kəs satılıb Azərbaycanda. Elə bilirsiniz azad sözdən, azadlıqdan dəm vuranlar, özünü demokratik qəzetçi göstərənlər satılmayıb? Xeyr, onlar da kimlərinsə cızdığı azadlıq çərçivəsində çabalayırlar. Amma sizə onların azad olduğu görünə bilər. Budur Azərbaycan. Budur onun iç üzü. Bunları görərək dözmək qədər çətindir Azərbaycanda yaşamaq.

“Məndən olmayan mənim düşmənimdir” prinsipinə sadiq qalmaqdır Azərbaycanda yaşamaq. Allı-güllü əlahəzrət nümayəndələri qarşısında sınaraq yaşamaqdır bizim halımız.

Qiymətlər qalxanda, jurnalistlər, gənc fəallar tutulanda oturub evdə allahına dua etməkdir Azərbaycan vətəndaşının işi. Hələ üstəlik ona-buna ağıl verməkdir Azərbaycanlının işi.

Elə bilirsiniz millətçilikdən danışanlar sevirlər Azərbaycanı? Yox sevmirlər. Onlar da mənim kimi sevmirlər vətənini. Sevsəydilər Ramil Səfərov vətən üstündə dəmir barmaqlıqlar arxasında qalmazdı. O, məmurlar da sevmir vətənini, sevmir azadlığı. Elə bilirsiniz onlar bir azacıq “azad” yazan mətbuatı aradan qaldıra bilməzlər. Bilərlər... İstəsələr lap yox edərlər. Sadəcə el xətrinə. Axı “Amerika, Almaniya ... bizə nə deyər” deyib azacıq da olsa nəvaziş göstərirlər. Bax bu qədər dözülməzdir Azərbaycanda yaşamaq.

Elə bilirsiniz bunlarla qurtardı? Yox, deməklə qurtarmayacaq qədər çoxdur bu vətənənin dərdi.

Bağışla, düzü deyirəm və deyəcəyəm də. Olmur... Səni də sevmək olmur. Bu qədər dərd içində də adam sevə bilər? Səni də sevmək olmur, AZƏRBAYCAN. Bağışla məni.

Zülümdür, vallah, zülümdür Azərbaycanda yaşamaq.
Elmin Bədəlov