Salam! Dinimizdə baxıciliğa münasibət... Cadu varmı? Qurani-Kərimin bu məsələlərə münasibəti
Hüseyn. Həmd yalnız Allaha məxsusdur! Yalnız Ona sığınır? yalnız Ondan yardım diləyirik. Onun izni olmadan heç bir şey heç bir zərər verə bilməz.
Sizin bəhs etdiyiniz baxıcılıq, cadu, sehr məsələsinə gəldikdə, bunları deyə bilərik: Belə bir şey mövcuddur. Ancaq bəzilərinin düşündüyü kimi, onun heç bir təsiri yoxdur. Rəsulullahdan (s) kahinlər (falçılar, cadugərlər, sehrbazlar) barəsində soruşduqda, o, belə cavab vermişdi: “Onlar heç nədir!” (Bax: Buxari. Tibb. 46, Tövhid. 57; Müslim. “Salam”, 122-124).
Dinimiz onları inkar etməyi fərz, təsdiq etməyi isə şiddətlə qadağan etmiş və bunun küfr olduğunu bəyan etmişdir.
Rəsulullah (s) belə buyurub: “Kim bir ərrafın (falçı, kahin) yanına gedib, onun söylədiklərini təsdiq edərsə, Məhammədə nazil ediləni inkar etmiş olar. Kim də yanına gedib, amma onun söylədiklərini təsdiq etməzsə, qırx gün namazı qəbul edilməz” (Təbərani). “Əyyaşlıq edən, sehrə inanan, qohumluq əlaqəsini kəsənlər cənnətə girməzlər” (İbni Hibban).
Sizi maraqlandıran məsələ - Quranın buna münasibəti, yuxarıda qeyd etdiyimiz kimi, Quran bunun küfr dərəcəsinə yüksələn haramlardan olduğunu bəyan edir: “Süleymanın səltənətinə (şahlığına) dair şeytanların oxuduqlarına (sehr kitablara) uydular. Süleyman (bu kitablara uymadığı üçün) kafir olmadı, lakin şeytanlar (bildikləri) sehri və Babildə Harut və Marut adlı iki mələyə nazil olanları xalqa öyrədərək kafir oldular. Halbuki (o iki mələk): “Biz (Allah tərəfindən göndərilmiş) imtahanıq (sınağıq), sən gəl kafir olma!” – deməmiş heç kəsə sehr öyrətmirdilər...” (əl-Bəqərə, 102). “Ey iman gətirənlər! Şərab da (içki də), qumar
da, bütlər də, fal oxları da Şeytan əməlindən olan murdar bir şeydir. Bunlardan çəkinin ki, bəlkə, nicat tapasınız! Şübhəsiz ki, Şeytan içki və qumarla aranıza ədavət və kin salmaqdan və namaz qılmaqdan ayırmaq istər. Artıq bu işə son qoyacaqsınızmı? “ (əl-Maidə, 90-91). Cadu-sehrin, falçıların, kahinlərin təsirinə gəldikdə, yuxarıda bəyan etdiyimiz kimi, onların heç bir təsiri yoxdur. Yalnız Allah bir qulunu sınağa çəkmək, cəzalandırmaq və sair hikməti yalnız Ona məlum olan səbələrdən dolayı bəzi qullarını, dilədiyi zaman onların təsirindən qorumur. Belə vəziyyətdə cadu- sehr onlara zərər verir. “...Lakin onlar (sehrbazlar) Allahın izni olmadan heç kəsə zərər verə bilməzlər!...” (əl- Bəqərə, 102). “...Hökm yalnız Allahındır. Mən ancaq Ona təvəkkül etdim. Qoy təvəkkül edənlər də ancaq Ona təvəkkül etsinlər!” (Yusuf, 67). “...Musa dedi: “Sizin etdiyiniz hər şey sehrdir. Allah, sözsüz ki, onu batil edəcəkdir. Allah fitnə-fəsad törədənləri sevməz! Günahkarlar istəməsələr də, Allah sözləri (əmr və hökmləri) ilə haqqı gerçəkləşdirəcək!” (Yunus, 81-82).
Baxıcılıq zərəli batil elimlərdəndir: “...Onlar (sehri öyrənənlər) ancaq özlərinə faydası olmayan, zərər verən şeyləri öyrənirdilər. Həqiqətən, onlar belə şeyləri satın alanların (Allahın kitabını şeytan əməlləri ilə mübadilə edənlərin) axirətdə payı olmadığını yaxşı bilirlər. Kaş ki, onlar özlərini nə qədər yaramaz bir şeyə satdıqlarını biləydilər!” (əl-Bəqərə, 102). Bu elm gələcəkdən xəbər verdiyini iddia edir. Halbuki qeybin (gələcəyin) xəbərlərinin məlumatı yalnız Allahın nəzdindədir. Bunu bildirən ayələr Qurani-Kərimdə olduqca çoxdur: “De: "Allahdan başqa göylərdə və yerdə olan heç kəs qeybi bilməz! Onlar yenidən nə vaxt diriləcəklərini də bilməzlər!” (ən-Nəml, 65). Allah qeybə dair lazım bildiyi bəzi məsələləri peyğəmbərləri vasitəsi ilə insanlara bildirmişdir. Cənnət və cəhənnəmin mövcudluğu, öldükdən sonra dirilmə, qiyamətin əlamətləri kimi qeyblə bağlı məlumatlar buna misaldır. “(Ya Rəsulum!) De: "Mən Allahın istədiyindən başqa özümə nə bir xeyir, nə də bir zərər verə bilərəm. Əgər qeybi bilsəydim, sözsüz ki, (özüm üçün) daha çox xeyir tədarük edərdim və mənə pislik də toxunmazdı. Mən iman gətirən bir tayfanı ancaq qorxudan və (yaxşı əməlləri müqabilində isə Cənnətlə) müjdələyənəm!” ( əl-Əraf, 188). Əgər Allahla insanlar arasında vasitəçi olan bir insanın - Hz. Peyğəmbərin (s) qeybdən xəbər verməsi mümkün deyilsə, onda hansı isə bir falçının, kahinin qeybdən xəbər verməsini necə inanmaq olar?
Baxıcılıq, cadu-sehir deyilən şey ta qədimdən mövcuddur. Bu çirkin elmin əldə etdikləri əsasən cinlərlə qurulan əlaqələr vasitəsi ilə baş verir. Bu, o insan tərəfindən bəzən könüllü edilir. İnsan bu batil elmi öyrənməklə cinlərlə təmasa girir və onların vasitəsi ilə sehrbazlıq, falçılıq işini yürüdür.
Məlum olduğu kimi, cinlər həm uzun ömrlü (min illərlə) olur, həm bəzi elmlərə sahib olurlar, həm də qısa bir zamanda uzun məsafələr qət edə bilirlər. Buna görə hər hansı bir cindar, falçı, sehrbaz hal-hazırda mövcud olan bir yer (məsələn, ev, onun içindəki əşyalar və s...) haqqında məlumat versə, buna təəccüblənmək lazım deyil. Çünki
onunla əlaqəli olan cinlər Allahın izni ilə o yerə gedib baxıb, geri dönüb həmən o cadügara bu məlumatları verə bilər.
Gələcəkdə baş verənlərə gəldikdə, gələcək haqqında onların verdiyi məlumatlar çoxusu əsasən təxmin və ehtimala dayanır.
Şeytanlar səmaya qədər yüksəlir və oradakı Allahın gələcək hadisələrini icra etməklə vəzifələndirdiyi mələklərin toplantısına yaxınlaşır. Bu toplantıda mələklər arasında söz edilən gələcəyə dair xəbərlərdən ala yarımçıq da olsa bəzilərini Allahın izni ilə oğurlayırlar. Cinlər bu ala-yarımçıq məlumatı kahinə çatdırır. Kahin bu məlumatları təhlil edib ustalıqla öz proqnozunu bəzəyib insanlara verə bilir. “Biz (sizə) ən yaxın olan göy üzünü (dünya səmasını) ulduzlarla bəzədik. (Biz həm də göyü) itaətdən çıxmış hər bir şeytandan qoruduq. Onlar ali bəzmə (yuxarı aləmə, mələklər aləminin söhbətlərinə) qulaq asa bilməz və hər tərəfdən qovulub atılar” (əs- Saffat, 6-8). “Ancaq (şeytanlar içərisində mələklərin söhbətlərindən bir sözü, bir xəbəri) çırpışdıran olsa, onu da dərhal yandırıb-yaxan bir ulduz tə’qib edər.” (əs-Saffat, 10). Hz. Aişənin (r) rəvayət etdiyinə görə, Rəsulullahdan (s) kahinlər (falçılar, cadugərlər, sehrbazlar) barəsində soruşdular. O: “Onlar heç nədir!” – deyə buyurdu. Camaat: “Ey Allahın rəsulu, amma onların bizə verdiyi xəbərlər doğru olur” dedi. Rəsulullah: “Onların bu xəbərləri həqiqətdəndir. Onu bir cin (mələklərdən) qaparaq (kahin) dostunun qulağına fısıldayır. Kahinlər də bir doğruya yüz yalan qarışdırır” – deyə buyurdu (Buxari. Tibb. 46, Tövhid. 57; Bədayətul-xalq 6; Müslim. “Salam” 122-124).
İbn Həcər deyir ki, cinlərin bu kəşfiyyat zamanı yandıran ulduz yaxmadan əvvəl ən üstəki şeytanın oğurlayıb altdakına göndərə biləcəyi hər zaman mümkündür.
Son olaraq bir daha təkrarlamaq istərdik ki, baxıcılıq, kahinlik, fal, cadu, sehr deyilən şeylər mövcuddur. Bunlar küfr dərəcəsinə yüksələn haramlardır. Quranın buna münasibəti açıq və birmənalıdır. Hər şeyin doğrusunu Allah bilir.