Qarışqaların başı mütəhərrikdir. Güclü inkişaf etmiş gəmirici üst çənələrə malikdir. Bu çənələrdən yuva qurulmasında və qidalanmada istifadə olunur. Başda mürəkkəb gözlər və dirsəkli bığcıqlar vardır. Bunlar qarışqanın istiqaməti təyin etməsinə, ətraf aləmlə əlaqə qurmasına kömək olur. Ayaqları yaxşı inkişaf etmişdir. Bunun sayəsində qarışqa özündən bir neçə dəfə böyük olan yükü daşıya bilir. Dişi və erkək fərdlərdə şəffaf zarlı qanad olur və asanlıqla qırıla bilir. İşçi qarışqalarda qanad olmur. Qarıncığın birinci və ikinci buğumlarının arası çox nazik olduğundan qarıncıq çox hərəkətlidir. Bu da qarışqanın sürətli hərəkət etməsinə, manevr etməsinə kömək olur. Bəzi qarışqa növündə qarıncığın sonunda tikancıq olur ki, bunu vasitəsilə şikarını sancır və onun bədəninə zəhər ifraz edir.