Min–min xatirəsi yazılıb onun
Alnında, üzündə o qırışlara.
Mənə qəzəbi də dönübdür indi
Sakit nəsihətə, yalvarışlara.
Enişli, yoxuşlu yollar görübdür,
Min tufan görübdür, min qar görübdür
Atam qocalır...

Allah olmayıb ki, həkim olubdur,
Sağalda bilməyib hər xəstəsini.
Ürəyi ağrıyıb, gözü dolubdur,
Ümid xatirinə boğub səsini -
Yalan da deyibdir xəstəyə bəzən.
Xəstələr yanında ümid tək gəzən
Atam qocalır...

Biz səkkiz uşaqığ, böyüdüb bizi,
Bu da asan deyil, çox çətin işdir
Atam onu bizə heç deməmişdir
İndisə odlara salır fikrimi,
Kimi gözləyirəm, görəsən, kimi?
Atam qocalır...

Əlimdən nə gələr, mən nə edim ki
Qanundur... zamanın qanunudur bu
Biz də onun kimi qocalıq təki,
Səkkiz yola dönüb bir ömrün yolu
Atam səkkiz dəfə cavan olacaq,
Bir də səkkiz dəfə o qocalacaq,
İlk dəfə, ilk dəfə atam qocalır...