Kimdən nə umursan, a başı daşlı,
Can deyə bilməyən can yandırarmı?
Kor yağı önündə qanından qorxan
İsmət çırağında qan yandırarmı?

Yandı, qara qaldı o saray, o dam,
Neynim, mən bir körpü uzağam, yadam.
Özgə ocağına su tökən adam
Tanrı məbədində şam yandırarmı?

Nə yaxşı, ərkim də çatdı qələmə,
Halal nan qazandım iki balama.
Kanın qiymətini bilən üləma
Moizə oxuyub, an yandırarmı?

Ruh ki sığınmadı xirqə, əbaya, -
Yüz də şərqi söylə Günəşə, Aya...
Abdəsti pozulan elə, obaya
Rəbb səba əsdirib, dan yandırarmı?..