Bu nə söz-söhbətdir, nə fitnə-fəsad?!
Nə işlər törənir insanlığa yad?
Yox-yox, odda yanmaz Quran heç zaman,
Quran ürəklərə həkk olub, inan!

Quranı cıranlar deyildir bəşər,
Heç vaxt xeyrə üstün gəlməyibdir şər.
O, şeytan işidir, kafir əməli,
Qurana qıyarmı heç insan əli?

İbrahim də oda atılan zaman,
Onda od olmadı məgər gülüstan?
Odda heç yanarmı Allah kəlamı,
Yanan Quran deyil, qoy bilsin hamı.

Yanan kafir, əbləh, şeytanlar oldu,
Cəhənnəm onlara bir məskən oldu.
Ey iblis xislətli, siz ey bədbəxtlər,
Allah kəlamından ey bixəbərlər,

Tanrı qəzəbinə tez gələsiniz,
Sizə qənim olsun öz əməliniz.
Günəşin işığın örtmək olarmı?
İsanı çarmığa çəkmək olarmı?

Haqqı yer üzündən silmək olarmı?
Onlar əbədidir, yaşayacaqlar,
Siz qorxun, cəzanız olacaq ağır,
Zalımın başına göydən daş yağar.

Quran ürəklərdə, Quran gözlərdə,
Quran vəsf olunur gözəl sözlərdə.
Yolumuzda sönməz işıqdır Quran,
Onu bəxş etmişdir bizə Yaradan.

Allahın ən gözəl töhfəsidir o,
İnsanın haqq səsi, nəfəsidir o,
Nəfəs kəsilərsə, insan yaşamaz,
Bəşər övladına bu iş yaramaz.

Şeytanlar, iblislər məhv olsun tezcə,
Həyat davam etsin ürəyimizcə.
Allahım, Sən göstər öz qüdrətini,
Əsirgəmə bizdən mərhəmətini,
Zalımın tezliklə kəs nəfəsini,
Ucalt hər tərəfdə haqqın səsini!