Türkiyədə məşhur serialların çəkildiyi villaların dəyəri milyonlarla ölçülür.
Televizyongazetesi.com xəbər verir ki, bu mülklərin dəyəri milyon dollarlarla ölçülür. Milyonlarla tamaşaçını ekran başına toplayan seriallar çəkildikləri evlərlə də diqqəti cəlb edirlər.

“Yaprak dökümü”
Serialda istifadə olunan evin sahibi rizəli təqaüdçü İzzet Tuzcuoğludur. Özü heç vaxt evlənməyən ev sahibinin atası 170 yaşı olan villanı öz təqaüdü ilə alıb. Villadan 1982-ci ildən seriallarda istifadə olunur. Villa sahibi tərəfindən gündəlik 500-750 lirəyə (315-473 dollar) icarəyə verilir. Mülkün öz dəyəri isə 2-3 milyon dollar arasındadır.

“Aşk ve ceza”
Serialdakı Savaş Baldar rolunun sahib olduğu villa şəxsi mülkdür. Villa 1500 kvardrat metrlik yaşayış sahəsinə malikdir. Bağçasında iki hovuzu olan villada 7 otaq və bir zal var. Mülkün dəyəri 4,5 milyon dollara yaxındır.

“Ezel”
Kənan Birkana məxsus olan ev Sultan Əbdülməcid tərəfindən 1856-cı ildə satın alınıb. 1899-cu ildə villa qızlar məktəbinə bağışlanıb. 1986-cı ildə baş verən yanğından sonra iş adamı Sakıp Sabancı binanı bərpa edib. Sarayın bir otağının kirayəsi 2500-6000 avro arasında dəyişir. Belə binalara qiymət qoyulması çətin olsa da, mülkün dəyərinin 100 milyon dollar olduğu ehtimal edilir.

“Lale devri”
Serialda istifadə olunan mülk 270 kvadrat metrlik ərazidə tikilib. Villanın 1120 kvadrat metrlik bağçası var. Hər yerindən dəniz mənzərəsi görünən villanın memarı milliyyətcə erməni Karapet Amira Balyandır. Mülkü 1981-ci ildə iş adamı İsmail Özdoyuran satın alıb.

Vaxtilə “Kurtlar vadisi” və “Gümüş” seriallarının çəkildiyi villa aylıq 50 min lirəyə (31 500 dollar) icarəyə verilir. Mülkün dəyəri isə 12 milyon dollardır.

“Öyle bir geçer zaman ki”
Əlinin keçmiş ailəsinin yaşadığı tarixi evin 100 yaşı var. Mülkün qiymətinin 500 min-1 milyon lirə arası (315-630 min dollar) olduğu bildirilir.