Sağ əlimdə qələm var,
Sol əlim sinəm üstə...
Evimizdə ölüm var,
Yeriyir asta-asta!
Əzab elə dözülməz,
Kədər elə çoxdu ki!...
Həsrətimin səsindən
Ölüm özü qorxdu ki!...
Tənhayam,kimsəsizəm,
Ölüm məni pusubdur.
Mənimlədir xəyalın,
Amma o da susubdu!
Sən mənim sevincimin
Sonuncu damlasısan!...
Dilsiz eşqimi,yəqin,
Özün də anlamısan!...
Bəzən danışmaq olmur,
Bəzən susmaq da çətin...
Gülməlidir,eləmi,
Bu yaşda məhəbbətim?!
Ömrün qürubundayam,
Dağbaşına qar düşür.
Payızıma çatmışam,
Yadıma bahar düşür!
Qızlar gülür eşqimə,
Otuzu adlamışam...
Axı öz ürəyimi
Həmişə odlamışam!...
Bircə sən gülmə mənə,
Yanına gələcəyəm...
Son dəfə oxşa məni,
Axı tez öləcəyəm!...
Bitib möhləti ömrün,
Son günlərim də çatdı.
Gülüm,gəl vidalaşaq,
Onda ölmək rahatdı...
Sağ əlimdə qələm var,
Sol əlim sinəm üstə...
Başım üstdə ölüm var,
Yeriyir asta-asta!...