Hacı Yusif Qulammirzə Oğlu
Heç kimi qoyma, Xudaya, dinin atsın, getsin,
Satıb imanını eyş-işrətə, batsın, getsin.
Günahın rəngi qəradır ki, qaraldır qəlbi,
Qoyma şeytan bizi ol rəngə boyatsın, getsin.
Kim ki, dünya malına oldu həris, abrın atır!
Əyri yollarla gedir dövlətə çatsın, getsin.
Varı artdıqca ürək daşa dönür, rəhm azalır,
Qıymaz öz qonşusuna bir əl uzatsın, getsin.
Nə qədər yığdı həram üstə həram, doymadı göz,
Gümanı var hələ dünyanı da satsın, getsin.
Yadına salmadı bir dəf’ə də heç, gəlsə əcəl,
İmkanı olmayacaq vaxtı yubatsın, getsin.
Ayaq altında qalanlar bezib öz canından,
Az qalıbdır boğazın kəndirə dartsın, getsin.
Haqq - ədalət sorağında gəzirəm dünyanı,
Görmədim bir kəsi haq tapsın, oyatsın, getsin.
Belə dünyadə ömür sürməyə dəyməz, ya Rəb,
Bir yuxu Yusifə ver, daimi yatsın, getsin!