Qurani Kərimin Nisa surəsinin 22 və 23-cü ayəsində evlənməyə icazə verilməyən qadınlar haqqında söhbət açılır. Bildirilir ki, atalarınızın evlənmiş olduğu qadınlarla evlənməyin! Yalnız keçmişdə (Cahiliyyət dövründə) olan bu cür işlər müstəsnadır. Əlbəttə, bu çox çirkin, iyrənc işdir və (Allahın qəzəbinə səbəb olan) pis bir yoldur!
Qeyd olunur ki, sizə analarınız, qızlarınız, bacılarınız, bibiləriniz, xalalarınız, qardaş və bacılarınızın qızları, süd analarınız, süd bacılarınız, arvadlarınızın anaları və yaxınlıq etdiyiniz qadınlarınızın himayənizdə olan qızları (ögey qızlarınız) ilə evlənmək haram edildi. Cinsi əlaqədə olmadığınız qadınlarınızın qızları ilə evlənmək isə sizin üçün günah deyil. Öz belinizdən gələn oğullarınızın arvadları ilə evlənmək və iki bacını birlikdə almaq da sizə haramdır. Yalnız keçmişdə (Cahiliyyət dövründə) olan bu cür işlər müstəsnadır.

Kişiyə nikahı əbədi olaraq haram olan qadınlar bu şəkildə təsnif olunub:
1. Analar və nənələr. İstər nikahlı bir evlənmədən, istər zinadan meydana gəlmiş olsa belə bir kişi anası və nənəsi ilə əsla evlənə bilməz.
2. Qızlar. Bura bir kişinin öz qızı, oğlunun qızı və ya qızının qızı daxildir. Nikahlı bir evlənmədən dünyaya gələn qız, atasına haram olduğu kimi, zinadan doğan qız da atasına haramdır.
3. Bacılar. İstər ana və ata bir olan, istərsə də ata və ya ana bir olan bacı olsun, qardaşı ilə evlənə bilməz.
4. Bibilər. Ana və ata bir, istərsə də ana və ya ata bir olan bibilərlə evlənmək qadağandır.
5. Xalalar. Bir kişi istər ana və ata bir, istərsə də sadəcə ana və ya ata bir olsun xala ilə əsla evlənə bilməz.
6. Qardaşın qızları. İstər ana və ata bir, istər sadəcə ana və ya sadəcə ata bir olsun, bir kişinin qardaşı qızı ilə evlənməsi qəti haramdır. Yeri gəlmişkən, bu kişi qadının əmisidir.
7. Bacı qızı. Ana və ata bir, ana və ya sadəcə ata tərəfindən olsun, bir kişinin bacısı qızı ilə evlənməsi haramdır. Çünki, bu kişi sözügedəın qadının dayısıdır.