Ey bəşər oğlu, oyanıb Həqqə gəl!
Sal yadına, sən nə olubsan əzəl!
İndi nəsən, Xaliqinə qaldır əl!
Xəlq eləyən cismini dolğun, gözəl,
Tək bir Odur, tək bir Odur, tək bir O!
Oxşarı yox, ortağı yox, təkdir O!

Ol ” deməyindən var olubdur cahan,
“Öl” desə, alt-üst olacaq asiman.
Hökmü kimi, rəhmi də vardır hər an.
İsbat edib, “ hər şeyə qadir olan,”
Tək bir Odur, tək bir Odur, tək bir O!
Oxşarı yox, ortağı yox, təkdir O!

Laməkan olmuş, O əzəldən Özü.
Halbuki hər yerdə Onun var izi.
Varlığına səcdə edir Yer üzü,
Əfv eləyən Ruzi-Qiyamət bizi,
Tək bir Odur, tək bir Odur, tək bir O!
Oxşarı yox, ortağı yox, təkdir O!

Göylərin altında görünmür dayaq,
Ay, Günəş, ulduzlara açmış qucaq.
Aləmi nur ilə edən çilçıraq,
“Hər cürə noqsandan , eyibdən uzaq,”
Tək bir Odur, tək bir Odur, tək bir O!
Oxşarı yox, ortağı yox, təkdir O!

Cəhd elə, Ondan aralı düşmə sən!
Çünki , Onun var xəbəri hər nədən!
Tut ətəyindən, Ona yalnız güvən!
İstədiyin Qalibi-Sultan edən,
Tək bir Odur, tək bir Odur, tək bir O!
Oxşarı yox, ortağı yox, təkdir O!