Allah rəhmət eləsin,
Vətən köçdü dünyadan.
Biqeyrətlər birləşib
Vətəni öldürdülər.
Arxasınca hər gecə
Sağlıq deyib içdilər,
Hər gün deyib güldülər.
Allah rəhmət eləsin
Vətəni öldürdülər.
Nadanlar, bivəfalar
Öldürdülər vətəni.
O vətən yoxdur daha
Nə başı, nə bədəni.
Üzünə yer deyilən
O ananı – vətəni
Yer üzündən sildilər.
Allah rəhmət eləsin
Vətəni öldürdülər.
Vətənsiz vətəndaşıq
Indi biz yer üzündə.
Vətəni də, daşı da,
Elə vətəndaşı da
Qoymadılar salamat,
Dağıtdılar, diddilər.
Allah rəhmət eləsin
Vətəni öldürdülər.
Yadellilər əlinə
Düşüb əsir olanda.
Əsrlərlə əsirlik
Zülmündə alçalanda.
Diktatorlar nitqinə
Məcburi əl çalanda.
Qədrini ana torpaq
Bəlkə onda bildilər
Allah rəhmət eləsin
Vətəni öldürdülər.
Deyəcəksiz görəsən
Necə ölər bir vətən?
O dağ boyda vətəni
De necə öldürdülər?
Əvvəl tariximizi,
Hər bir olub keçəni,
Dünəni öldürdülər.
Sonra təhsilimizi
Çevirdilər bazara:
Bilməyənə güldülər
Biləni öldürdülər
İki yerə böldülər
Parçalayıb vətəni
O tayından bu taya
Keçəni öldürdülər.
Nəhayət tariximizi
Yaddaşlardan sildilər
Nəticədə bütöv bir
Vətəni öldürdülər…
Vətəndən yaz deyirlər
Hansı vətəndən yazım?
Vətənsiz vətəndaşın
Vətən şeiri olarmı?
Vətən adı çəkməyin!
Vətən yaşamır daha…
O vaxtdan ki vətəni
Yadelliyə satdınız,
Qarnımın doyduğu yer
Mənə vətəndir deyib
Vətəni alçaltdınız,
O vaxtdan ki kreslo
Vətəndən baha oldu.
Tank önündə pişiklər
Kresloya oturdu
Dönüb əjdaha oldu.
O vaxtdan ki Qarabağ
Içki məclislərində
Dillərdə sağlıq oldu
Ana dili bilməyib
Özgə dildə danışmaq
Ki üzü ağlıq oldu
Həmin vaxtdan vətəni
kəfəninə bükdülər
Allah rəhmət eləsin
Vətəni öldürdülər…