DÜNYA YALAN DÜNYADIR...
Yer də, göy də, günəş də
Yalan yığıb köksünə.
Adam baxıb mat qalır
Güzgüdə öz əksinə!
Dünya yalan dünyadır-
Qalanına inanma!
Qaçaq düşüb doğrular,
Yalanına inanma!...

Biri “ dostunam “- deyir,
Biri ayaqdan qazır.
Biri gülüb üzünə,
Xəlvəti səndən yazır!
Dünya yalan dünyadır-
Düzünə də inanma!
Yeri gələndə, vallah,
Özünə də inanma!...

Dünən nağıla döndü,
Bir yaradır- indisi.
Axı, neyləmək olar,
Mərd kişilər gendəsə?!
Dünya yalan dünyadır-
Gələninə inanma!
Ürəyi qan ağlayır,
Güləninə inanama!...

Eh, nə olsun... Yenə də
Həyat şirindir, şirin.
Dolanırıq başına
Ötüb- keçən günlərin!...
Dünya yalan dünyadır-
Öləninə inanma!
Şərdən qaçıb,xeyrini
Böləninə inanma!...

Dünya yalan dünyadır,
Yalanları ram elə.
Bu günləri düşünüb,
Yada sal, bayram elə!
Dünyanın namərdinə-
Pislərinə inanma!
Ümidsiz insanların
Sözlərinə inanma!...