Bu nə fid-fasondur eyibdir, eyib,
Qızım utanıram kəndə qayıtma.
Avropanın çırıq şalvarın geyib,
Qızım utanıram kəndə qayıtma.

Pəhriz saxlamağın qəlbini dəlib,
Acından ölürsən belin incəlib,
Qara gözlərinə yaşıllıq gəlib,
Qızım utanıram kəndə qayıtma.

Şəhərə gedəndən olmusan gəlin,
Qoyunun yunu tək qıvrılıb teli,
Russan, azərisən bilinmir dilin,
Qızım utanıram kəndə qayıtma.

Yanağın böyüyüb, dodağın şişib,
Zaqar eyləmisən dərin dəyişib,
Sırqan da gəlib burnuna ilişib,
Qızım utanıram kəndə qayıtma.

Açıqdı kürəyin,açıqdı sinən,
Bu qədər də çılpaq gəzərmi zənən?
Beləmi geyinib əvvəllər nənən?!
Qızım utanıram kəndə qayıtma.