Hindli alimlər dərmanlar haqqında maraqlı araşdırmaya imza atıblar. Sən demə, insanlar xoşlarına gələn rəngdə dərman qəbul edəndə özlərini daha gümrah hiss edirlər. Əlbəttə, xəstələr dərman qəbulunda həkimə və əczaçılara güvənirlər. Ancaq bu onların acı dərman qəbul etmək istədiyi mənasına gəlmir.
Araşdırmanın nəticəsinə görə, qəbul edilən həbin forması, dadı, rəngi və hətta adları belə xəstələr üzərində böyük təsirə malikdir. Xəstələr tərəfindən daha çox üstünlük qırmızı və çəhrayı həblərə verilir.
Araşdırmada iştirak edən 600 nəfərlik qrupun 15 faizə yaxını dərmanın rənginin önəmli olduğunu vurğulayıb. Məsələn, onlar qırmızı, çəhrayı həblərin dadının daha yaxşı olduğunu, sarıların duzlu dada malik olduğunu, 11 faiz mavi və ya ağ həblərin acı, 10 faiz isə narıncı dərmanların daha turş olduğunu düşündüyünü deyib. Rəngli həblərə üstünlük verənlərin yaş həddi də müxtəlifdir. Belə ki, gənclərdən fərqli olaraq yaşlı kişi və qadınıar qırmızı həb qəbul etməyə daha çox meyllidirlər.
Dərmanlar üzərində araşdırma aparan alimlər belə kiçik amillərin müalicənin nəticəsinə müsbət təsir etdiyini bildirirlər. Belə ki, insan dərmanın rəngindən və dadından təsirlənərək onun sağaltmaq gücünə də psixoloji olaraq inanır. Bu da bəzən gözləniləndən daha tez nəticə əldə etməyə imkan verir.