YUNİSEF BMT-nin uşaq hüquqları Konvensiyasının 20 illiyi münasibətilə hesabat yayıb
Əfqanıstan Yer üzündə dünyaya gəlmək üçün ən pis yerdir. BMT-nin Uşaq Fondunun (YUNİSEF) BMT-nin uşaq hüquqları Konvensiyasının 20 illiyi münasibətilə hazırladığı hesabatda belə deyilir.
YUNİSEF-in məlumatına görə, ən çox uşaq ölümü Əfqanıstanda qeydə alınır-hər 1000 doğulan uşağa 257 ölüm. Üstəlik, ölkə əhalisinin 70 faizi təmiz içməli su əldə edə bilmir. “Taliban” hərəkatı silahlılarının yüksək fəallığı beynəlxalq humanitar təşkilatların fəaliyyəti üçün təhlükəlidir: Əfqanıstan ərazilərinin 43 faizi bu təşkilatlar üçün əlçatmazdır. Beləliklə, bu ölkədə uşaqlar arasında epidemiyalara qarşı vaksinasiya həyata keçirmək qeyri-mümkündür.
YUNİSEF-in hesabatında bildirilir ki, Əfqanıstanda qızların həyatı xüsusilə təhlükəlidir. “Taliban”ın qaydalarına görə, qızlara məktəbə getmək və təhsil almaq qadağandır. Bu üzdən son bir il ərzində silahlılar təhsil müəssisələrinə 317 basqın edərək, 124 uşağı öldürüb, 290 nəfəri isə yaralayıblar.