Səndən yeni görüş istəmərəm mən,
özün rəhm eyləyib-gəlsən,nə olar!...
Ürəyimin qanı axdı gözümə,
zərif əllərinlə silsən, nə olar!...

Dünya başqa olur-insan sevəndə,
gərək yüz ölçəsən,könül verəndə...
Hər dəfə demirəm,məni görəndə,
bircə yol üzümə gülsən,nə olar!...

Ayrlıq-könlümün sarı simidir,
eşqim-fırtınaya düşmüş gəmidir...
Sevdiyim,yaxın gəl,hicran dəmidir,
ömrün möhnətini bilsən,nə olar!...