Bəziləri bu əqidədədirlər ki, İmam Mehdinin (ə) zühurundan öncə zalım hakimlərə qarşı qiyam qaldırmaq haramdır. Onlar İmamSadiqdən (ə) nəql olunmuş bir rəvayətə istinad edirlər. Həmin rəvayətdə buyurulur: “Qaimin (ə.f) qiyamından öncə ucalan hər bir bayrağın sahibi zalımdır (tağutdur) və Allahdan qeyrisinə ibadət edir.” Üsuli-kafi, c/8, səh/295
Bu barədə nə demək olar?

1. Bu rəvayət ümumi şəriət üsulu, o cümlədən əmr bil-məruf və nəhy ənil-münkər (yaxşılığa dəvət və pislikdən çəkindirmə) və cihad hökmlərinə ziddir. Çünki bu üç hökmün mərtəbələri var və bu mərtəbələrdən biri qiyamdır.Əliəsğər Rizvani, Əsrin İmamı Mehdi (ə.f) ilə tanışlıq, səh177

2. Bir çox rəvayətlərin mənbəsi ilə bağlı problemlər var.

3. Bəzi rəvayətlərdən məlum olur ki, İmam ümumilikdə inqilabların mümkünlüyünü inkar etmir, sadəcə, onların son hədəfə çatmayacağını bildirir. Necə ki, Zeydin və Muxtarın qiyamları son hədəfə çatmadı.

4. İnqilaba çağırış iki növdür:

Bəziləri Əhli-beyt hakimiyyətinin bərpa olunmasına çağırır və belə bir çağırış batil deyil.

Bəziləri isə digər şəxsi məqsədlərini həyata keçirmək üçün batilə dəvət edir. Beləcə, uyğun rəvayətlərdə şəriət və Əhli-beyt İmamlarını müdafiə üçün qaldırılmış qiyamlar nəzərdə tutulmur. İmam Səccaddan (ə) Muxtarın qiyamı haqqında soruşulduqda buyurdu: “Qara bir qul bizə yardım üçün ayağa qalxsa, ona yardım göstərmək vacibdir.” Biharül-ənvar, c/45, səh/365

İmam Sadiq (ə) buyurmuşdur: “Bəni-Haşimdən on iki nəfər qiyam qaldırıb xalqı dəvət etməyincə Qaim zühur etməyəcək.” Şeyx Tusi, əl-Ğeybə, səh/437.