. Bayaqdan formatlayırıq, antivirus vururuq, xeyri yoxdur.-Mehdi uşaq kimi dodaqlarını büzdü.
-Gözləyin,-Ramazan onlara göz vurub İsmayıla yaxınlaşdı, səsini incəldərək ağzını onun qulağına tutdu,-İsmayıl, oğul, aç gözlərin! Atan səni tikintiyə aparacaq. Aç gözlərini!
İsmayıl gözlərini Sevildən çəkib əli ilə Ramazanı yana itələdi. Tərs-tərs Əligilə baxıb:
-Nədir, nə yığışmısınız başıma?-dedi.
-Axır ki, dünyayla əlaqəni bərpa elədin.
Ramazan özündən razı halda Əliyə baxıb:
-Elədin yox, elədin.-deyə özünü göstərdi.
-Ayə, bayaqdan qabağında çıxarmadığımız oyun qalmayıb, sən elə heeeyy oralardasan.-başıyla Sevili işarə eləyən Mehdi İsmayıla göz vurdu.
İsmayıl heç nə olmamış kimi gözlərini qaçırıb:
-Gözüm yol çəkirdi.-dedi.
-Desənə, gələcəkdə Bakıda çəkiləcək körpü və keçidlərin çertyojunu indidən çəkirəm.
İsmayıl bir qaşını qaldırıb kinayə ilə Əlini süzdü:
-Mən yol çəkirəm, sənin kimi yol çəkmək arzusuyla yaşamıram ki.
-Nə demək istəyirsən, indi?
-Heç nə. Prosto deyirəm ki, arzu qarın doyurmur. Allah deyir, səndən hərəkət, məndən bərəkət.
Mehdi gözləri parıldar şəkildə Ramazana baxıb:
-Aha, söhbət qızışır.-dedi.
İsmayılla Əli tərs-tərs ona baxdılar. Elə bu vaxt sinfə girən Leyla uşaqların diqqətini cəlb eləmək üçün səsini qaldırıb Sakit müəllimin gəlmədiyini, ona görə də Mirvari müəllimənin bu dərsi sakit oturmağı tapşırdığını elan elədi. Çox keçmədi ki, sinif rəhbərinin özü də gəldi. O da eyni şeyləri təkrarlayıb getdi. Dərs başlayandan gözü Ayanın boş partasında olan Əli axır ki, Sevincgilə yaxınlaşdı.
-Sevinc, Ayanla Asya niyə gəlməyib?
Yusif Əliyə göz-qaş eləyir, soruşub Sevinci şübhələndirmə deyə işarə eləyirdi. Sevinc gülməmək üçün dişlərini bir-birinə sıxıb Əliyə baxdı:
-Belə havalarda Ayanı məktəbə atası gətirir. Amma bu gün xəbərim yoxdur, bəlkə atasının işi çıxıb. Nə olub ki?
Əli sözü necə fırladacağını düşünə-düşünə barmaqlarını bir-birinə sıxırdı.
-Heeç, soruşdum da elə-belə. Həmişə soruşmuram?-sonra nəsə yadına düşmüştək,-İngilis