qolu ilə onun qoluna vurmaqdan bezmişdi. Yusif daha heç nə deməyib Əliyə sarı getdi. Yusifin dediklərini eşitsə də Asya bu dəfə də heç bir reaksiya vermədən Ayana sarı getdi və niyə gec gəldiklərini xəbər aldı. Yerinə keçən Ayan onu tək buraxdığı üçün Sevincə tərs-tərs baxmağı da unutmadı. Digər tərəfdə isə dostları Əlinin başına yığışmışdılar.
-Bu hələ çox şişəcək, gömgöy olacaq. Sonra da qapqara qaralacaq.-Yusif barmaqlarını Əlinin gözünün altında gəzdirərək deyirdi.
-Özü çox yumruq yeyib axı, bilir-deyə Əli İsmayılgilə Yusifi işarə edərək güldü.
-De, indi də yemişəm də.-Yusif də öz gözünün altını göstərdi.
İsmayıl maraqla Yusifə baxıb soruşdu:
-Səncanı, o yumruq səni necə tutdu?
-Nə bilim ə? Elə Əlini dartışdırırdım ki, bir də gördüm sol tərəfdə işıqlar söndü.
Bu sözə Mehdi ürəkdən güldü. Yusif ona baxaraq ağzını büzdü:
-Gül, gül. Sənə dəyməyib axı.
Qəhqəhəsini saxlayan Mehdi kinayə ilə:
-Pah, mənə dəyməyib?-deyə Yusifə baxdı.-Şalvarımı güclə təmizləmişəm e. Bax,-deyə o, şalvarının ətəklərini göstərdi,-bütün təpiklər mənə dəyirdi e. Hələ arada bir qulağımı da kimsə dartdı.
-Dartacaq da. Sənə kim deyirdi, Əlini itələyib özünü onun yerinə bas?-İsmayıl kinayəli təbəssümlə ona baxdı. Sonra özündən razı şəkildə filləndi.-Aranızda ən salamatı mənəm.
Onlar beləcə söhbət eləyirdilər ki, zəng çölə vuruldu. Bəziləri tənəffüsə çıxdı. Mirvari müəllimə cəld və əsəbi addımlarla sinfə girdi. Sinifdəkilər onu görüb ayağa qalxsalar da o, əli ilə “Oturun!” deyə işarə verdi. Sonra üzünü sinfə tutub:
-Bu nə haqq-hesabdır?-deyə qışqırdı.-Nə idi canınızın ağrısı?-üzünü Tarielə tutdu.-Sən ağıllanmayacaqsan? Ayə, sənin üstündə mən nə qədər danlanmalıyam?
-Müəllimə, mən neylədim ee?-deyə Tariel ağzını yana əydi.-Əli başladı da.
-Hələ bir danışmağa dilin də var, ə?-o, qşqıra-qşqıra çantasından eynəkqabını və dəftər-kitabını çıxardı. Yenidən üzünü sinfə tutub-Hanı bu sinfin qalanı?-deyə soruşdu.
-Tənəffüsdədirlər.-deyə Ələddin yerindən dilləndi.
-Get, çağır hamısını!