təlaşla əlini havada yellədi:
-Müəllimə, olar bir söz deyim?
-De.
-Müəllimə, onların ikisi də yalan danışır.-deyə ayağa qalxan Ayan sözə başlamaq istədi.
Lakin Əli ona tərs-tərs baxaraq:
-Ayan, otur yerinə!-dedi.
Ayan da eyni mimika və səs tonuyla:
-Duranda səndən icazə almamışdım!-dedi.
Sinifdə gülüşmələr və pıçıldaşmalar bir-birini əvəz etməyə başladı. Mirvari müəllimə əlini stola bərk-bərk vurub:
-Bəsdir!-deyə onları sakitləşdirdi. Sonra üzünü Ayana tutaraq qaşlarını çatdı.-Necə yəni ikisi də yalan danışır?
-Müəllimə, siz məni yanınıza çağırıb dediniz ki, get uşaqlara de ki, Şakir müəllim yoxdur, sakit otursunlar. Mən də gəlib bunu dedim. Keçib yerimə oturanda jurnalı axtardım. Bura qoymuşdum,-o əliylə partasının altındakı boş aralığı göstərdi,-amma tapmadım. Sonra bir də gördüm ki, jurnal Tarielgildədir.
Bunu eşidən Mirvari müəllimə dönüb tərs-tərs Tarielə baxdı. Ayan isə sözünə davam eləyirdi:
-Getdim ki, jurnalı Tarieldən alım, vermədi. Başladı ələ salmağa.
-Sən də adam kimi istəyərdin də.-Tariel dözməyib özünü müdafiəyə keçdi.
Əli dişlərini bir-birinə sıxdı. Yumruğunu düyünləyib tərs-tərs Tarielə baxdı.
-Tariel!-deyə Mirvari müəllimə səsini qaldırdı.
Ayan isə danışmaqda davam eləyirdi.
-Sonra Əli durub jurnalı ondan alıb mənə verdi. Tariel başladı Əliyə sataşmağa. Əli nə qədər “Tariel bəsdir!” dedisə də ona təsir eləmədi. Əli də məcbur olub onu vurdu.
-Düz deyir?-deyə Mirvari müəllimə bu dəfə daha hirsli səs tonu ilə lövhədəkilərə baxdı.
Heç biri dinmədi. Əli başını aşağı dikmiş, Tariel isə əksinə boynunu dik tutmuşdu.
-Sizinləyəm! Ə, Tariel, utanmırsan, yalan danışırsan? Özü də bu boyda sinfin qabağında? Jurnalın səndə nə işi var idi? Deməmişəm, jurnala sinifkomdan başqa heç kim dəyməsin?
-Ayan sinifkomdur?-deyə Tariel üzünü turşutdu.
-Yaxşı ə, qışqırma! Oğru elə qışqırdı ki, doğrunun bağrı yarıldı! Sinifkom icazəlidir bu gün, gəlməyib. Hə, neyləməliydi? Leyla sinifkomluğu sənə tapşırmalı idi?-Mirvari müəllimə indi də üzünü Əliyə