olduğundan Nuridə xala Sevinci öz qızından ayırmırdı.
Nuridə xala gülərüzlə içəri girdi. Onu görən qızlar hörmət əlaməti olaraq ayağa qalxdılar. Nuridə xala onları salamlayıb Sevinci təbrik etmək üçün qucaqlayıb öpdü. Arzularını dedi. Minnətdarlıq eləyən Sevincin isə bir gözü qapıda idi. Qızının bu halını duyan Xavər xala Yusifi xəbər aldı:
-Yusif neyləyir, haralardadır?
Buna görə Sevinc anasına göz də ağartdı. Nuridə xala isə oğlundan gileylənməyə başladı:
-Eh, ay bacı. Yusifdən heç danışma. Səhər saat ondan evdən çıxandır. Əvvəl dedi, test zad almalıyam. Sonra zəng elədim ki, haradasan? Dedi ki, uşaqlarlayam. Saat on iki oldu, gəlmədi, bir oldu, gəlmədi. Zəng elədim ki, ay bala haradasan? Dedi qızlayam. Nə bilim, hazırlıqdan bir qız var, onunla.
Sevinc tutuldu, özündən ixtiyarsız qaşları düyünləyib narahat halda yerində qurdalandı.
-Bayaq yenə də zəng eləmişdim. İndi də deyir ki, Əli ilə parkdayam.
Aaa, hələ evə gəlməyib?-heyrətdən Xavər xalanın ağzı açıq qalmışdı.
-Yox, ay qız! Bəs mən niyə odlanmışam? Doqquz saatdır e uje, bu gədə evə yığışmır. Valeh evdə deyil, eşitsə evdə qan düşəcək. Axır vaxtlar da yaman fkirli olub, gözü səndədir, fikri Allah bilir haralarda. Gərək bir sözü beş dəfə soruşasan ki, cavab verə.-Nuridə xala üzünü Sevincə tutdu-Ay qızım, siz yaxınsınız, sən bilərsən. Bu gədənin yenə də qız məsələsi zadı yoxdur?
-Yox, Nuridə xala, bilmirəm. Mənə heç nə demir.
-Əşşi,-Nuridə xala ah çəkdi,-nə atasından yarıdım, nə balasından. Şorgöz oğlu, şorgöz!
Onun bu sözünə Asya ilə Ayan gülüşdülər. Nuridə də xala da güldü:
-Gülməlidir, vallah gülməlidir. Mənim oğlum kimisini heç birinizə arzu eləmirəm.
Sevinc biraz da tutuldu. Anası isə bayaqdan ona baxır, qızının həyəcanını başa düşməyə çalışırdı. Biraz daha söhbət elədikdən sonra Nuridə xala sağollaşıaraq getdi. Onun dedikləri isə Sevincin əhvalını əməlli-başlı təlx eləmişdi. Deməli, ən xoş günündə, bəlkə də ən çox ehtiyacı olduğu bir gündə Yusif onun yanında yox idi. Heç olmasa, dost