an Mehdi öz-özünə qışqırmağa başladı. Hamı dönüb ona baxdı.
-Nə olub, a bala?-Hafizə müəllimə də təəccübünü gizlətmədi.
-Müəllimə, İsmayıla ləqəb tapdım. Smayl!
Uşaqlar gülüşdülər. Hafizə müəllimə də gülərək:
-Gülərüz oğlandır. Məncə yaraşar.-deyə razılıqla başını tərpətdi.
Yavaş-yavaş digər uşaqlar da gəldilər. Kəmalə müəllimə gəlmədiyindən Hafizə müəllimə iki qrupa bir yerdə dərs keçməli oldu.

Tənəffüs idi. Yağış səbəbindən hələ də dərsə gəlməyənlər var idi. Sevil bərk islandığından Asya pencəyini ona vermişdi. İsmayıl öz pencəyini Sevilə vermək istəsə də doğrusu buna cürət edə bilmirdi. Uşaqların onları, xüsusilə də Sevili araya qoyub gülməklərindən, sataşmaqlarından ehtiyat elədi. Çünki, hələ öz hislərini özü də tam götür-qoy edə bilməmişdi.
Ayan da bu gün dərsə gəlməmişdi. Əli heç kimə bir söz deməsə də, Asyayla Sevincdən nəsə soruşa bilməsə də pəncərədən çəkilmirdi. Yusif də onun bu halından xəbərdar idi. Ona görə də başları test eləməyə qarışan Asya ilə Sevinclə yaxınlşadı. Qabaqdakı boş partada üzü qızlara tərəf oturaraq Sevincdən:
-Testdir?-deyə soruşdu.
-Hmm.-Sevinc başını testdən qaldırmadı.
-Yorulmayasınız. Kömək lazımdır?-sonra testlərə baxaraq,-Su kimi şeylərdir ki, bunlar.-dedi.
-Elə su kimidir deyə kömək lazım deyil də. Qaynar çaya keçəndə biz sənə xəbər eləyərik.-Sevinc Asyaya göz vuraraq güldü.
-Da. Ona pravilno qovorila.
Bir neçə saniyəlik sükut çökdü. Yusif Sevincin diqqətini çəkmək üçün qələmlə testin üstünü taqqıldatdı.
-Hə?-Sevinc əsəbi halda ona baxdı.
Yusif başıyla arxanı-pəncərədəki Əlini göstərərək soruşdu:
-Ayan niyə gəlməyib bu gün?
-Xəbərim yoxdur.
-Siz necə dostsunuz? Asya, sən də bilmirsən?
-Yox, doroqoy.
Asyanın “doroqoy”u Sevincə gülməli gəlmişdi:
-Doroqoy?! Nç!
Yusif də güldü.
-Gör e, bu qədər sevgilim olub, biri də mənə doroqoy deməyib.
Sevinc özünü saxlaya bilməyib maraqla ona baxdı.
-Nə demək istəyirsən indi?
- Burada nə var ki, uşaqlar? Pis söz deyil ki.
-Mən nəsə demirəm ki Asya. De,