ə gözləyək,-Ülviyyə müəllimə saatına baxdı,-sonra jurnalla yoxlayaram.
İsmayılın gözləri həmişə olduğu kimi özündən xəbərsiz Sevilə zillənmişdi. Sevil isə bir əlini gicgahına dayayıb kitaba baxırdı. Anidən arxaya dönən Züleyxa İsmayılı gördü və tez qabağa çevrildi. İsmayıl da Züleyxanın onu gördüyünü hiss edib tez özünü yığışdırdı.
Qapı döyüldü. Yusiflə Əli astaca qapını aralayıb içəri girdilər. Yusif çəkinə-çəkinə:
-Salam müəllimə, olar?-icazə istədi.
Ülviyyə müəllimə məzəmmət dolu baxışlarla onları süzüb:
-Niyə gecikmisiniz?-deyə soruşdu.
Əli də eyni çəkingənliklə:
-Müəllimə, yatıb qalmışdıq.-dedi.
-Niyə? Gecə uşaq saxlayırdınız?
Onun bu sözünə sinifdəkilər gülüşdülər. Yusif də gülə-gülə:
-Xeyr müəllimə. Mən etiraf eləyirəm ki, kinoya baxırdım.-dedi.
-Hələ bir gülür də. Sənin indi kinoya baxan vaxtındır? Dərsləri kim oxuyacaq? İki dənə buraxılış imtahanı verəcəksiniz e.
Yusif təəccüblə soruşdu:
-İki dənə niyə?
-Nə bilim, bu il elə olacaq.-Ülviyyə müəllimə üzünü Əliyə tutaraq-Sən də gecə kinoya baxmısan?-deyə soruşdu.
Yusif yenə Əlinin yerinə cavab verdi.
-Xeyr müəllimə, o alimlik eləyib.
-Neyləyib?
-Əli qərar verib ki, oxusun. Kinodakı Elşən kimi qırx gün qırx gecə oxumaq qərarına gəlib.
-Sən imkan verəcəksən, özü danışsın?
-Bağışlayın, müəllimə.
Ülviyyə müəllimə Yusifə tərs-tərs baxaraq dedi:
-Nə isə. Keçin oturun.-dedi, sonra jurnala göz gəzdirib daha kimlərin olmadığını xəbər aldı.
-Rəhimlə Günel yoxdur.- deyə Leyla cavab verdi.
-Doğrudan e, bu Rəhim heç gəlmir?
-Bu il gəlmir. Keçən il də ki, axırıncı rüb az-az gəlirdi.
-Nə olub ona? Xəbəri olan var?
Kərəm yerindən dilləndi:
-Müəllimə, o, işləyir.
-İşləyir?
-Bəli, maşın yuyulan yerdə-moykada.
-Niyə, onun yeri bura deyil?
-Müəllimə, ailələrinin vəziyyəti yaxşı deyil. Ona görə məcburən işləyir.
-Hmm. Nə isə, keçək dərsə. Nə vermişdim?
Hamı kitabı vərəqlədi.
Gödəkçələrini asılqandan asan Əliylə Yusif gəlib yerlərində oturdular. Yusif həvəslə dostunu salamladı:
-Salam dost,