qorxur, direktor isə Əlidən. Məncə sən bir də fikirləş, bir qıza görə dəyməz.
-Eşitdin?-Mehdi özünü ciddi tutmağa çalışaraq Ramala baxdı.-Mən bunları sənə demək istəmirdim. Vallah özümdən çox sənə görə qorxuram. Biz necə də olsa çırpılmağa öyrəşmişik, amma sən naşısan, tab gətirməzsən.
-Gedin ə buradan! Bunlara bax, mənim gözümü qorxudurlar. O variant çoxdan ölüb. Hələ bilmək olmaz, kim kimə tab gətirməyəcək.-Ramal bir qədər ətrafa boylandı-Bayaqdan buradayam, amma o qızı görə bilmirəm. Bəlkə də görmüşəm, amma tanıya bilməmişəm. Maşallah, sizin məktəbin bütün qızları bir-birinə oxşayır. İndilik gedirəm, hazırlığım var. Ancaq mənim də adım Ramaldırsa o qızı tapacam və özümü sevdirəcəm. Onda görərik sizin Əlini.
-Ramal,-deyə Mehdi dişlərini qıcayaraq ona baxdı,-qohumsan demərəm, bir dənə ilişdirərəm buradan evinizə qədrə ayağın yerə dəymədən gedərsən. Bağla, bu söhbəti!
-Yaxşı, yaxşı, qorxdum, gedirəm.-Ramal lağla əllərini yana açıb bir-iki addım geri getdi.-Amma mən sözümün ağasıyam, ha, görərsən.-deyib yenə də sağa-sola boylana-boylana oradan aralandı.Mehdi əlləri ilə başını tutub ətrafına baxır, nə eləyəcəyini bilmirdi:
-Ay daa, bu işin içindən necə çıxacam, ə? Bunun kimi qohumum olana qədər min manat borcum olaydı.
-Bu Ayanı haradan gördü ki?-deyə Ramazan təəccüblə soruşdu.
-Dünənki imtahanda. Bizimlə bir otağa düşmüşdü. Amma haradan bilim ki, belə olacaq? Ayə, Əli bilsə necə olacaq?
-Gəl biz hələ ki Əliyə heç nə deməyək. Desək, Əli coşacaq, sonra qan düşəcək. Məncə qohumun prinsipə düşüb, bir-iki günə yadından çıxarar.
-İnşallah Ramo, İnşallah! Nə qədər ki Əli buralarda yoxdur, gedək buradan.
Məktəbdən çıxan Xəyal müəllim əvvəl evə getmək istəsə də sonra qərara gəldi ki, dükana-qardaşının yanına getsin. Həm təmir üçün çağrılan ustalarla tanış olar, həm qardaşına kömək eləyər, həm də ürəyini boşaltmağa adam tapar. İndi buna daha çox ehtiyacı var idi. Xatirə müəllimə ilə danışdıqlarını fikirləşə-fikirləşə gəlib dükanın qabağına çatdı. Bu vaxt Rafiq