q saxladı. Bir-iki addım geri gedib dükanın divarına qısıldı. Maşın sürətlə onun yanından ötüb uzaqlaşdı. İsmayıl gözlərini bərk-bərk yumub özünü divara söykədi. Ürəyi boğazında döyünür, həyəcandan bütün bədəni əsirdi. Barışmaq istəmədiyi reallıq gözünün qabağında idi:sevdiyi qız başqasına nişanlanmaq üzrə idi. Ömrünün ilk sevgisi başlamadan bitirdi. Bəlkə başqa zaman, başqa şərtlər olsa idi, İsmayıl buna icazə verməz, nəyin bahasına olursa olsun buna mane olardı. Amma indi onun nə Sevili qaçıracaq bir yeri, nə də ona baxacaq imkanı var idi. Heç on səkkiz yaşı da tamam deyildi. Atasının əlinə baxan bir məktəbli idi sadəcə. Digər tərəfdən də Sevilin ailəsinin dayısının hesabına dolnadığını da bilirdi. Bu boyda həqiqətin qarşısında sevdiyinə xoşbəxtlik arzulamaqdan başqa əlindən nə gələ bilərdi axı? Təki Sevil ondan gözünü çəksin və xoşbəxt olsun.
Artıq bir həftəyə yaxın idi ki, Əlidən aralanmayan Mehdi indi də onun dalınca düşüb Xatirə müəlliməgilin binasına qədər gəlmişdi.
-Ayıbdır e sənin üçün. O boyda müəlliməni ayağına çağırırsan?
-Mixaylo, neçə dəfə deyəcəm, ayağıma çağırmıram, o onsuz da şəhərə gedəcək. Vabşe sənin burada nə işin var e? Nə düşmüsən dalımca?
-Camaata yaxşılıq da yoxdur.-Mehdi ağzını büzərək çəp-çəp ona baxdı.-Neçə gündür, burada sənin üçün səfərbər olmuşam, sənin də çox sağolun bu oldu?
-Ayə, yaxşı da, o dəqiqə incimə. Dediyim odur ki, hələ bir saat var, bir saata evə qayıdacaqdım.
-Tədbiri əldən vermək olmaz. Həm də mən sənin üçün gəlməmişəm. Hüseynlə Məleykə xalanın xahişi ilə buradayam.
-Onların da səndən fərqləri yoxdur. İki-üç gündür, bir əllərində naşatr bankası, o birində pambıq paçkası arxamca gəzirlər.
-Naşatr demişkən,-Mehdi əlindəki kloku açıb diqqətlə içinə baxdı,-bu necə şeydir? Adam bunu iyləyəndə özündən gedir ki?
-Hə, nə badə iyləyəsən, ha! Başıma oyun açma!
-Narahat olma, prosto maraq üçün soruşdum.
Binaya çata-çatda Əli ayaq saxladı.
-Buradan o yana gedə bilmərəm,-dedi,-ayaqlarım getməz.-kədərlə Ayangilin