müəllim stoluna baxdılar. Müəllimi yerində görməyib içəri girə-girə sinifdəkilərdən:
-Müəllim yoxdur?-deyə soruşdular.
-Bu gün biraz gecikəcək.-Leyla dilləndi.-Siz harada idiniz?
-Oppalarda.-deyə Mehdi gülə-gülə yerinə keçdi.
Kənan da yerinə keçdi. Lakin onun arxasında gizlətməyə çalışdığı bağlama sinifdə bəziləri kimi Leylanın da diqqətindən yayınmadı. Gözlərini qıyıb biraz fikirləşdi, sonra öz-özünə :
-Ay da, gör necə yadımdan çıxıb. Bu gün onun ad günü imiş.-dedi. Elə həmin an da özü-özünü inkar edərək -Guya yadında olsaydı nə edəcəkdin? Ona hədiyyə alacaqdın?-deyə kinayə ilə gülümsündü.
Tənəffüsdə Asya Mehdidən bir xeyir olmayacağını görüb ona xəbər etmədən özünü Nigar müəllimənin yanına yetirdi. Otağa yaxınlaşıb qapını astaca taaqıldatdı. İçəridən “Buyur”deyə səsi eşitcək qapının dəstəyini aşağı burdu və qapını araladı. Nigar müəllimə Mirvari müəllimə ilə qarşılıqlı nəyisə müzakirə edirdilər. Sinif rəhbərini görüb Asya çıxmaq istəsə də:
-Gəl Asya, biz də elə Əlidən danışırdıq.-deyə psixoloq onu saxladı.
Başıyla Mirvari müəlliməni salamlayan Asya içəri girdi.
-Müəllimə, Əli ilə danışa bildiniz?
-Yox, cəhd elədim, amma məndən qaçdı. Bayaq gördüm ki, bufetdə tək oturub mən də gedib yanında oturdum. Dedim ki, gəl dərsləşək, müəllimə, zəng vuruldu, deyib aradan çıxdı.
-Tərsdir də tərs! Bunların hamısı belədir.-Mirvari müəllimə narazı halda dilləndi.
-Onu da başa düşmək lazımdır, müəllimə. İndi onu heç nəyə məcbur eləmək olmaz. Əgər özünün danışmaq istəyi, psixoloqa inamı olmasa, mən onun ağzından heç cür söz ala bilmərəm.
Asya məyus halda dodaqlarını büzüb gözlərini yerə dikmişdi.
-Müəllimə,bəs onlara necə kömək eləyək? Əli Yusiflə də danışmır, Ayanla da.
-Nə, Yusiflə danışmır? Ayanla da? Mən min dəfə deməmişəm, sinifdə küsülülük olmasın?
-Müəllimə, səbrli olun, bu normal haldır.-Nigar müəllimə sonra üzünü Asyaya tutdu.-Narahat olma, gözəlim, hər şey öz qaydasına düşəcək. sadəcə Əliyə vaxt lazımdır. Bu vaxt ərzində də siz onun yanında olmalınız.