. Amma mən səni tələsdimək istəmiləm.
-Onda birinci qardaşın evlənsin də. Onsuz da yazıqlar neçə ildir, gözləyirlər. Bax Xəyal, mən inanmıram ki, mənimkilər bu tezliklə toya razı olsunlar. Çünki Ayanın babası təzəliklə rəhmətə gedib, o da mənim atama qohum düşür.
-Yaxşı, onda mən evdəkilələ bir də danışım. Onsuz da Lafiq Əsməli qaçılam deyib dayanıb. Amma elçiləlimi göndələcəm ha.
-Yaxşı, mən bu gün anamla danışaram.
-Səni seviləm.
-Gedim e, Xəyal,-Xatirə müəllimə gözlərini qaçırıb əllərini onun əllərindən çəkərək,-saat üçdə hazırlığım var.-dedi.
-Yaxşı, gedək onda. Elə mənim də hazılığım val.
Onlar gəzə-gəzə parkdan çıxdılar.
Qızını hazırlıqdan gətirən Malik dayı yolboyu onları izləyən qaraltıdan da, neçə gündür qonşularında eşitdiklərindən də cana yığılmış, hirsini boşaltmağa yer axtarırdı. Sevincin yanında heç nə deməsə də evə gələndən sonra arvadını da qabağına qatıb qonaq otağına keçdi.
-Keç otur, orada.-deyə hirsli şəkildə ona divanı göstərdi.
-Nə olub, ay Malik?-Xavər xala təlaşla ona baxdı,-Niyə əsəbisən?
-Otur orada, deyəcəm,-deyən Malik dayı qapı tərəfdəki kresloda oturdu, sual dolu baxışlarını ondan çəkməyən arvadından,-Bu qız niyə axır vaxtlar hazırlıqdan o gədə ilə gəlmir?-deyə soruşdu.
Bu sualla təəccübünə təəccüb əlavə olunan Xəvər xala ona baxıb çaşqın şəkildə çiyinlərini çəkdi.
-Başa düşmədim, sən həmişə qız onunla gələndə hirslənirdin, indi nə oldu?
-Sualıma sualla cavab vermə, Xavər. Nə soruşduğumu çox yaxşı bilirsən. Bunların arası niyə dəyib?
-Nə bilim,-Xavər xalanə deyəcəyini bilmirdi,-uşaqdırlar da, küsüblər yəqin.
-Xavər, guya bilmirsən? Mənim qulağıma heç də yaxşı şeylər çatmır ha. Bu gədə tez-tez həyətdə, bacada, qızın qabağını kəsirmiş. Nə məsələdir?
Duruxan Xavər xala vəziyyətdən necə çıxacağını bilmədi.
-Aaa, Malik,-deyə özünü heç nə olmamıştək aparmağa, gülümsünməyə başladı,-sən də elə danışırsan ki, guya Yusif yoldan keçənin biridir. Kim deyir ki, qabağını kəsir? Bunlar bir yerdə böyüyən uşaqlardır, dalaşarlar da,