s eləmirəm. Gərək toy bu tezliklə olmazdı.
-Hə, hə, hazır deyilsən. Sən hələ yol gözlə, Xatirə üçün darıxmışam bəhanəsi ilə həftə səkkiz mən doqquz, Xırdalanın yolunu tut, bir xəbər varmı deyə gələn-gedənin ağzına bax.-Reyhan kinayə ilə dilləndi.
-Reyhan,-deyə Ayan sərt şəkildə ona göz ağartdı,-nə danışırsan sən?!
-Nə bilim, nə danışdığımı sən məndən yaxşı bilirsən. ay qız,-Reyhan özünü bacısına sarı verib daha sakit, amma amiranə tərzdə,-eşidəm, biləm ki, İlkinə soyuq davranırsan, naz eləyirsən, ya da evdə problemlər yaradırsan, mamadan qabaq sənin saç-başını mən yolaram.-dedi.-Vallah, o hələ yaxşı adamdır ki, sənin nazına dözür. Başqası olsaydı, heç üzünə də baxmazdı.-deyə əlavə də etdi.
Ayan isə bunun qarşılığında heç nə deyə bilmir, susurdu. Elə bu vaxt maşına oturan İlkin maşını işə sala-sala qızlara baxıb:
-İki bacı baş-başa verib nə danışırsınız belə?-deyə soruşdu.
-Heeç, elə-belə.-Ayan heç nə olmamıştək sakitcə dilləndi.
-Deyirəm bacımı bundan sonra daha az görəcəm,-Reyhan da heç nə olmamıştək gülümsədi,-qoy doyunca dərdləşim. Sən danış e, nə qədər tərlədin?
-Hə, deməli belə baldız,-bir gözü arxada, maşını arxa-arxaya verib əsas yola çıxan İlkin qabaq güzgüdən Reyhana baxıb biraz kinayə, biraz da zarafatla,-gələn dəfə salona gedəndə saçının modelindən əvvəl pulu ilə maraqlan.-dedi.
-Doğrudan?-Reyhanın rəngi qaçdı.-Nə qədər tutdu ki?
-Hər nə qədər, verilən pulun arxasınca ağlamazlar. Mənim üçün pul problem deyil e, prosto qənaət də yaxşı şeydir. Yazıq Asif.-İlkin sonuncu cümləni daha asta tərzdə köks ötürüb başını bulayaraq demişdi. Lakin Reyhan sözü də, onun üz ifadəsindəki mənanı da başa düşmüşdü. Ona görə də narazı şəkildə yerində qurdalanaraq qaşlarını düyünləyib üzünü pəncərəyə tutdu. Ayan isə cismən maşında idi. Xəyalı yenə də onu uzaqlara, özünün də (onun) yerini bilmədiyi yerlərə aparmışdı.
İsmayıl maşını birmərtəbəli, sadə görünüşlü bir evin qabağında saxlayıb maşından düşməyə hazırlaşırdı. Bura onların yeni evləri idi. Artıq iki ilə