gülümsədi.-Dünən dəftərimin arxasında bir qızın nömrəsini görüb. Soruşur ki, bu kimdir? Mən də başa sala bilmirəm ki, bacım qrup yoldaşının nömrəsini yazanda əl altda mənim dəftərim olub, götürüb ora yazıb. Dirəşib ki, yox e, köhnə sevgilindir. Axır birtəhər başa salmışam ki, mənim səndən başqa istədiyim qız olmayıb. Əslində qısqanmağı xoşuma gəlir. Sevən insan qısqanar da.
Sanki bu sözdən sonra Əlinin ağlına nəsə gəldi. Gözlərini qıyıb öz-özünə:
-Qısqanmaq...qısqandırmaq...-deyə təkrar eləməyə başladı.
-Nə oldu?-deyə İsmayıl maraqla ona baxdı.
-Deyəsən, ağlıma bir fikir gəldi.
-Nə fikir?
-Dayan, hələ təzə gəlib. Qaçmamış qoy yaxşı-yaxşı fikirləşim.
-Başına hava gəlir, nədir?
-Suusss!-deyə barmağını dodaqlarına apardı.

Məktəbdə zəng ilk dərs üçün içəri vurulmuşdu. Siniflə salamlaşıb hazırqayıb edən Xatirə müəllimə lövhəyə doğru gedərək əlinə təbaşiri götürüb sütun şəklində “ruçka, mel, vilka, papa, pol, tak, sovsem”kimi sözlər yazmağa başladı. Hamı maraqla lövhəyə baxırdı.
-Bunlar nədir, müəllimə?-deyə Mehdi marağını gizlədə bilməyib soruşdu.
-Nə olduğunu siz deyəcəksiniz?-deyə Xatirə müəllimə əlini işdən ayırmadan dedi.
-Bunlar hər gün işlətdiyimiz sözlərdir də.-deyə Zaman ağzını büzərək dilləndi.
-Hər gün işlətdiyimiz rus sözləri!-Sevinc düzəliş verdi.
Yazıb qurtaran Xatirə müəllimə üzünü sinfə tutdu:
-Sevinc düz deyir. Bunlar gündəlik həyatımızda işlətdiyimiz rus sözləridir. Dilçikdə bunlara alınma sözlər də deyirlər. Gəlin baxaq, bu sözlərin dilimizdəki qarşılıqları necədir?
Xatirə müəllimə bir-bir sözləri işarə elədikcə uşaqlar yerbəyerdən onların mənalarını deməyə başladılar:“qələm, təbaşir, çəngəl, ata, döşəmə, belə, tamamilə” Sonra o, yenidən üzünü sinfə tutdu:
-Deməli, buradakı bütün sözlərin dilimizdə qarşılığı var və mən də sizin köməyinizlə bunları yazdım. Gördüm ki, hamınız bunların qarşılığını bilirsiniz. Bəs bildiyiniz halda niyə gündəlik danışığınızda rus mənşəli sözləri işlədirsiniz?
Sinfə sükut çökdü. Heç kim dinmədi. Ya