tərəfdən də içini yeyib bitirən şübhələrdən qurtulmaq istəyirdi. Çünki bu həyatda onun ən çox qorxduğu şey-kiminsə günahını almaq idi. Xatirə müəllimə isə Ayanın Kərəm haqqında dediklərini dönə-dönə xatırlayır, bu hərəkəti heç cür ona yaraşdıra bilmirdi. Dayanmadan da özünü danlayırdı. “Necə oldu ki, Kərəmin bu münasibətini vaxtında başa düşüb qarşısını almadım? Axı necə oldu onda mənə qarşı bu münasibət yarandı? Mənim səhvim harada idi?”
Növbəti gün. Dərs başlar-başlamaz Xəyal müəllimin dükanının yanması və buna görə də Kərəmin tutulması xəbəri işıq sürətilə bütün məktəbə yayıldı. Tanımayanlar da artıq Kərəmi tanımağa başlamışdılar. Söz ağızdan-ağıza düşdükcə zəli kimi şişirdi. Hətta vəziyyət o həddə çatmışdı ki, artıq məktəbin digər ucunda Xəyal müəllimin qardaşının Kərəmin atasına borclu olduğu və Kərəmin də buna görə dükanı yandırdığı danışılırdı.
On bir a-nın uşaqlarını isə bu söz-söhbətlərdən daha çox Kərəmin taleyi maraqlandırırdı. Mirvari müəllimə dərsdə uşaqlardan Kərəmin xəbərini alsa və özünü bu hadisəyə görə təəccüblənmiş kimi göstərməyə çalışsa da Kərəmin müəllimlərinə qarşı münasibətini bilib vaxtında daha ciddi tədbir görmədiyi üçün özünü danlayırdı. Dərsboyu Ayanı fikirli və məyus görən Əli isə ona göz-qaş edərək diqqət çəkdiyini başa salmağa çalışırdı.
Tənəffüs. Bəzi oğlanlar arxa pəncərənin qabağına toplaşıb Mehdidən Kərəmin dünən necə tutulmasını, polis idarəsində olanları dinləyirdilər. Əlinin yanında oturan İsmayıl isə ona Cəbrdən başa düşmədiyi misalı başa salmağa çalışırdı. Amma heç cür fikrini çatdıra bilmirdi. Əli də bezmişdi.
-Yaxşı e smaylik, özünü yorma. Onsuz mən də başa düşmürəm.
-Fikrim Kərəmin yanındadır,-deyə İsmayıl qələmi dəftərin üstünə atıb ah çəkdi,-görəsən o yazığın axırı necə olacaq?
-Allah kərimdir, nə yazılıbsa, o da olacaq.
-Hamı danışır, hərə bir söz deyir, amma yenə də mənə bir şey çatmır. Kərəmi bu hərəkətə vadar eləyəcək qədər gözünü kor eləyən nədir?
-Kor məhəbbət.-Əli gözlərini dəftərə dikmiş, nə dediyinin