eləyibmiş ki,
arvadından boşanıb bacısı qızı ilə evlənməsən,
sənə haqqımı halal eləməyəcəm. Sonra...-
dərindən köks ötürüb qəhərdən tutulan boğazını
arıtlamaq üçün öskürdü.-Sonra qopan qiyamət,
sənin səhərə qədər ağlamağın, papanın evdən
gedib yenə üç gün itməyi...Sonra ara
soyuyandan sonra mənim könlümü alsın deyə bu
Tetrisi alıb gətirdi. Axı mən onun oğlu idim. Elə
bildi ki, bir oyuncaqla könlümü ala biləcək. Mən
də acıqla gözünün qabağında yerə atıb
sındırdım. Bax, mən bütün bunlara görə ad
günümə də, atama da, nənəmə də nifrət
eləyirəm.
Bir müddət araya səssizlik çökdü. Hər ikisi
üzünü yan tutmuş, gözyaşlarına boğulurdular.
Sonra Əminə xala özünü toplayıb gözlərini silə-
silə qızına baxdı.
-Sən mənə də nifrət eləyirsən deyəsən? Hər
dəfə Bakıya gələndə bu söhbətləri açıb
yaralarımı təzələməkdən zövq alırsan? Bizi belə
qınayırsansa, onda sən çalış, bu səhvləri
təkrarlama, həyatını elə qur ki, səndən sonra
dünyaya gələnlər əzab çəkməsinlər.
-Məndən sonra bu dünyaya heç kim gəlməyəcək.
Sevgi, ailə, övlad, mən bu səhvləri eləməyəcəm.
-Doğrudan? Keçən dəfə evin ortasında ikiqat
olub, “mama, mən də sənin elədiyin səhvləri
elədim, ürəyimlə bacarmıram” deyən mən idim?
-Mən ürəyimlə vicdanımı qarışdırmışdım.-İnci
gözlərini qaçıraraq daha sakit və laqeyd şəkildə
dilləndi.
-İnci, hamıya yalan sata bilərsən, amma anana
yox. Guya, niyə mənimlə qayıtmaq istədiyini
bilmirəm?
-Bilmirsən. Çünki yarışım var. Bir də ki, mən
onun yaddaşı yerinə qayıdıb hər şeyi
xatırlayandan sonra yenə arxamca
gəlməyindən, hər şeyin təkrarlanmağından
qorxuram.
-Yaxşı, mən səni başa düşürəm. Amma çalış bu
qədər eqoist, keçmişinə qarşı bu qədər kinli
olma.-Əminə xala qızına daha yaxın oturub
yanaqlarını əllərinin arasına aldı, İncinin
ondan qaçırmağa çalışdığı nəmli gözlərinə
baxıb-Mən keçmişimlə barışıb hər şeyin
üstündən xətt çəkə bilmişəmsə, bunu sən də
bacarmalısan. Çünki heç biriniz mənim qədər
əzab çəkməmisiniz. Bunu heç sizə arzulamaram
da.