? İstəyirəm ki,məni bu evdən əliboş qaytarmayasan. Rüstəm səndən ötrü dəli-divanədir. Bilirəm, Ədaləti istəyirsən. Amma Rüstəm... - Sənəm xala, sizə qəti sözümü deyəcəyəm. Sevgidə, məhəbbətdə hökm verən ürəkdir. Mən öz hökmümü artıq vermişəm. Ədalətlə bir-birimizi sevirik. Qəlblərə, könüllərə zor etmək olmaz! - dedim. Sənəm xala hirsli halda ayağa qalxıb bəd ağzını açdı: - Məni və oğlumu məyus etdiyin üçün görüm, səni həmişə məyus olasan! Sənə heç zaman xoşbəxtlik arzulamıram. - Sənəm, dilin necə gəldi, qızımı qarğıdın?! - Anam Sənəmə bərk qəzəbləndi. - Dediklərinin hamısı dilindən uçunub qoynuna tökülsün. Ertəsi gün Sənəmin bizə gəldiyini Ədalətə söylədim. O, gülərək dedi: - Yəqin ki, sən də razı oldun?! Niyə də razı olmayasan, kolxoz sədrinin gəlini olmaq hər adama nəsib olmur... - Əlbəttə, razı oldum. Rüstəm də, maşallah kənddə sayıb-seçilən oğlanlardandır. Heç bir şeydən korluq çəkmir. Atasının canı sağ olsun. Onun hesabına istədiyimiz kimi firavan yaşayacağıq da, - Ədaləti əsəbiləşdirmək istədim. Ədalət məni yaxşı tanıdığından və dediklərimin zarafat olduğunu başa düşdüyündən daha başqa bir söz demədi. O, dərhal mövzunu dəyişd: - Solmaz, təhsil məsələsində qərarımda dəyişiklik etmişəm. Rusiyada oxumağı üstün tuturam. Bu barədə sənin də fikrini bilmək istəyirəm. - Mən sənin çıxardığın qərarların həmişə tərəfdarı olmuşam. Amma belə çıxır ki, ali təhsil yollarımız ayrılır. - Niyə ki? Tətillərdə yenə də birlikdə olacağıq. Bizi bir-birimizdən heç kəs ayıra bilməz. Bir neçə gündən sonra bildim ki, Rüstəm “şayka”ları ilə birlikdə Ədaləti “razborka”ya çağırıblar. Onlar bıçaq çıxarıb Ədalətin boğazına dirəyiblər ki, məndən əl çəksin. Ədalət də deyib ki, Solmazın yolunda ölmək, onun üçün misilsiz şərəfdir.Çünki Solmazla onu yalnız ölüm ayıra bilər. Ədalətin cəsarətini və sevgisinə olan sədaqətini görən Rüstəmin yoldaşları bundan sonra ona heç bir söz deməyərək onu rahat buraxıblar. ... Mən tibb institutuna, Ədalət isə Moskvada Lomonosov adına universitetə qəbul