Haradasa, kim isə, səninçün yaradılıb
Sənindir əbədiyyən…
Sahiblənmək gərəkdir səninçün yaranana,
Sənə məxsus olana.
Sahiblənmək gərəkdir
Xoşbəxtliyi, sevinci
Səndən asılı olana,
Gecələri fikrində ilişərək qalana
Sahiblənmək gərəkdir…
Sən ona rast gəlincə o sahibsiz qalacaq
Sən də sahiblənməsən sahibsiz qocalacaq…
Təkcə bədəninə yox, ruhuna, daxilinə,
Bəlkə də bir ailənin sahiblənmədiyinə
Sahiblənmək gərəkdir…
Bu dünyaya gələndə yarım doğulur insan
Sən həyatda yarımsan
Nə qədər ki səninçün yaranmış o qadını
Axtarıb tapmamısan…
O sahibsiz çiçəkdir…
Tapmaq vəzifə deyil, sahiblənmək gərəkdir…
Çox çətindir qadının sahiblənmək qəlbinə
O səninsə, çəkinmə, hər əzaba gər sinə
İstəyirsə bu dünya lap dolansın tərsinə
Tale özü o qəlbi səninki edəcəkdir
Düşünmədən o qəlbə sahiblənmək gərəkdir…
Ən bədbəxt qadınlardır sahibsizlər dünyada
Əgər sahib çıxmasan sahib çıxmaz dünya da…
Bəxş et hər cür sevinci, gül üzünə sahib ol
Göz yaşını unutdur, gülüşünə sahib ol
Sən sahiblənə bilsən o daim güləcəkdir
Daima gülsün deyə sahiblənmək gərəkdir
Düşünmə etdiklərin qalacaqdır əvəzsiz
Əlbəttə bu sevgini o bir gün görəcəkdir
Sənində soyadına o sahiblənəcəkdir!